സഭകളില്‍ ശുദ്ധീകരണം

`കത്തോലിക്കാസഭ ദിവ്യകാരുണ്യ കേന്ദ്രീകൃതം!`

Print By
about

രു പാശ്ചാത്യസഭയും ഇരുപത്തിയൊന്നു പൗരസ്ത്യസഭകളും ചേരുന്ന ആദ്ധ്യാത്മിക കൂട്ടായ്മയാണ് ആഗോള കത്തോലിക്കാസഭ! ഓരോ പൗരസ്ത്യസഭകള്‍ക്കും ആരാധനാക്രമത്തിലും മറ്റും നിശ്ചിതമായ സ്വാതന്ത്ര്യം അനുവദിച്ചിട്ടുണ്ട്. എന്നാല്‍, ആഗോള കത്തോലിക്കാസഭയുടെ വിശ്വാസസത്യങ്ങളെ അംഗീകരിച്ചുകൊണ്ടുള്ള പൊതുവായ നിയമം എല്ലാ സഭകള്‍ക്കും ബാധകമായിരിക്കും. ഇത്തരത്തിലുള്ള പൊതുവായ നിയമങ്ങള്‍ പിന്തുടരുന്ന സഭകളാണ് റോമന്‍ കത്തോലിക്കാസഭ എന്നപേരില്‍ ഒറ്റ കൂട്ടായ്മയായി മുന്നോട്ടുപോകുന്നത്. ഒന്നായിരിക്കുമ്പോഴും, വിഭിന്നമായ ആശയങ്ങള്‍ ഓരോ സഭകള്‍ക്കുമുള്ളത് ആരോഗ്യപരമല്ലെന്ന സത്യം തുറന്നുപറയാന്‍ മനോവയ്ക്കു മടിയില്ല. കാരണം, അതുതന്നെയാണു യാഥാര്‍ത്ഥ്യം!

ഒരു കൂട്ടുകക്ഷി ഭരണം രാഷ്ട്രീയമായിപ്പോലും അസ്ഥിരതയുണ്ടാക്കുമെങ്കില്‍, അതിനേക്കാള്‍ ഗുരുതരമായ പ്രത്യാഘാതമായിരിക്കും ആദ്ധ്യാത്മിക തലത്തിലെ ഭിന്നസ്വരങ്ങള്‍മൂലം സംജാതമാകുന്നത്. കത്തോലിക്കാസഭയില്‍ ഇന്നു കാണുന്ന മുറുമുറുപ്പുകള്‍ ഇതിന്‍റെ പ്രകടമായ തെളിവാണ്. റീത്തുകള്‍ക്കിടയില്‍ രൂപപ്പെട്ടുവരുന്ന കുറുമുന്നണികളെ ഗൌരവത്തോടെ കണ്ടില്ലെങ്കില്‍, സാത്താന്‍റെ ദൗത്യത്തില്‍ അവന്‍ വിജയംവരിക്കും എന്നു മറക്കരുത്! ഒരിടയനും ഒരു തൊഴുത്തും എന്നതുകൊണ്ട് കര്‍ത്താവ് ഉദ്ദേശിച്ചത് എന്താണെന്നു നാം അറിഞ്ഞിരിക്കണം. ഒരിടയനു കീഴിലുള്ള ആടുകള്‍ ആ ഇടയന്‍റെ ആജ്ഞയനുസരിച്ചായിരിക്കും മേയുന്നത്. അതുപോലെതന്നെ, തൊഴുത്തിലും ഇവന്‍റെ നിയമങ്ങള്‍ ബാധകമാണ്! കര്‍ത്താവ് ആഗ്രഹിക്കുന്നതു തൊഴുത്തില്‍ക്കുത്തല്ലാത്തതുകൊണ്ട്, ഇടയനെ അനുസരിക്കാന്‍ കഴിയാത്തതും തൊഴുത്തിലെ നിയമങ്ങളോടു വിധേയത്വമില്ലാത്തതുമായ ആടുകളെ നിര്‍ബന്ധപൂര്‍വ്വം പിടിച്ചുനിര്‍ത്താന്‍ ശ്രമിക്കരുത്! മാത്രവുമല്ല, പുതുതായി വരാന്‍ തയ്യാറുള്ള ആടുകള്‍ക്കുവേണ്ടി തൊഴുത്തിലെ നിയമങ്ങള്‍ പൊളിച്ചെഴുതേണ്ടതുമില്ല! അങ്ങനെ സംഭവിച്ചാല്‍, കാലങ്ങളായി ഇടയനും തൊഴുത്തിലെ നിയമങ്ങള്‍ക്കും വിധേയപ്പെട്ടു ജീവിക്കുന്ന ആടുകള്‍ക്കു വേദനാകരമാവുകയും അവയില്‍ അന്തച്ഛിദ്രം ഉടലെടുക്കുകയും ചെയ്യും!

നാനാത്വത്തിലെ ഏകത്വം കത്തോലിക്കാസഭയില്‍ ഭൂഷണമാണോ എന്നകാര്യം അനുഭവങ്ങളില്‍നിന്നു പഠിക്കേണ്ടിയിരിക്കുന്നു. വിഭിന്നമായ ആചാരങ്ങളും വിശ്വാസങ്ങളുമുള്ള മനുഷ്യര്‍ ഒരുമിച്ചു ജീവിക്കുന്ന മതേതര സങ്കല്‍പം ലോകത്തിനുപോലും പൂര്‍ണ്ണമായി വിജയകരമല്ല. മറ്റു പോംവഴികള്‍ ഇല്ലാത്തതുകൊണ്ട് സെക്കുലറിസത്തെ സഹിക്കുന്നുവെന്നതാണു യാഥാര്‍ത്ഥ്യം! നാനാത്വത്തില്‍ ഏകത്വത്തിനു പേരുകേട്ട ഇന്ത്യയുടെ സ്ഥിതി മാത്രം പരിഗണിച്ചാല്‍ ഇതു വ്യക്തമാകും. വിവിധ മതങ്ങള്‍തമ്മില്‍ മാത്രമല്ല, ഭാഷയുടെ അടിസ്ഥാനത്തില്‍പ്പോലും പോര്‍വിളികള്‍ നടക്കുന്ന രാജ്യമാണ് ഇന്ത്യ! ഭൌതീകതയിലെ സ്ഥിതി ഇതാണെങ്കില്‍ ആത്മീയതയില്‍ സെക്കുലറിസത്തിനു സ്ഥാനമുണ്ടോ?! അതായത്, മതത്തില്‍ മതേതരത്വത്തിനു സ്ഥാനമില്ലാത്തതുപോലെ, സഭയില്‍ സഭേതരത്വത്തിനും സ്ഥാനമില്ല! അതിനാല്‍ത്തന്നെ, മതാന്തരസംവാദങ്ങള്‍പ്പോലെ ഫലശൂന്യമാണ് സഭാന്തരസംവാദങ്ങളും!

എക്യുമെനിക്കല്‍ സംവാദങ്ങള്‍ നടത്തി സമയം പാഴാക്കുന്ന മൗഢ്യത്തില്‍നിന്നു പിന്തിരിയാന്‍ ഇനിയെങ്കിലും സഭ തയ്യാറായില്ലെങ്കില്‍, ഇപ്പോഴുള്ള കെട്ടുറപ്പിനെ അതു ബാധിക്കുമെന്ന കാര്യത്തില്‍ യാതൊരു തര്‍ക്കവുമില്ല. കത്തോലിക്കാസഭ മുറുകെപ്പിടിച്ചിരിക്കുന്നതും അനേകം വിശുദ്ധര്‍ പിന്തുടര്‍ന്നതുമായ വിശ്വാസസത്യങ്ങളെ ബലികഴിക്കുവാനും അതുവഴി സഭയെ ശിഥിലമാക്കുവാനുമുള്ള ഏതൊരു നീക്കത്തെയും സഭാമക്കള്‍ ചെറുക്കണം! വ്യത്യസ്ഥമായ ആശയങ്ങളില്‍ ഉറച്ചുനില്‍ക്കുന്നവര്‍ ഒരു തൊഴുത്തില്‍ കഴിയുന്നത് നല്ലതല്ലെന്ന് അനുഭവത്തിലൂടെ നാം പഠിച്ചതാണ്! കത്തോലിക്കാസഭയില്‍ ഇപ്പോള്‍തന്നെ ആവശ്യത്തിലേറെ കലഹങ്ങളുണ്ട്. ഇപ്പോള്‍ നടത്തുവാന്‍ തയ്യാറെടുക്കുന്ന ഐക്യശ്രമങ്ങള്‍ അവയെ ഒന്നുകൂടി വര്‍ദ്ധിപ്പിക്കാന്‍ മാത്രമേ ഉപകരിക്കുകയുള്ളു.

ആഗോള കത്തോലിക്കാസഭയിലെ വിശുദ്ധരെപ്പോലും അംഗീകരിക്കാത്ത സ്വതന്ത്രസഭകള്‍ കത്തോലിക്കാസഭയുടെ ഭാഗമായി ഇപ്പോഴുണ്ട്! താരതമ്യേന വിശുദ്ധര്‍ കുറവുള്ളതും തീരെ ഇല്ലാത്തതുമായ സഭകള്‍ ലത്തീന്‍ സഭയിലെ വിശുദ്ധരെ നിന്ദിക്കുന്ന അവസ്ഥ മനോവയ്ക്കു നേരിട്ടറിയാം. മരണത്തിനുശേഷം നൂറ്റാണ്ടുകള്‍ കഴിഞ്ഞിട്ടും ശരീരം ജീര്‍ണ്ണിക്കാത്ത വിശുദ്ധരുടെ ശരീരത്തെക്കുറിച്ച് സീറോമലബാര്‍സഭയിലെ ഒരു കല്‍ദായവാദി പറഞ്ഞ വാക്കുകള്‍ അവരുടെ പൊതുവായ അഭിപ്രായമാണെന്ന കാര്യത്തില്‍ സംശയമില്ല! 'ചത്തവന്‍റെ ശരീരത്തിലെ പുഴുക്കളെപ്പോലും തിരുശേഷിപ്പെന്ന പേരില്‍ അള്‍ത്താരയില്‍ വണങ്ങുന്ന റോമന്‍ കത്തോലിക്കാസഭ' എന്നുപറയാന്‍ തയ്യാറാകുന്നവരെ സഭയുടെ ഭാഗമാക്കിയത് ഒരുതരത്തിലും ന്യായീകരിക്കാവുന്നതല്ല! കല്‍ദായരില്‍ വിശുദ്ധരില്ലാത്തതിന്‍റെ ആത്മരോഷം ഇത്തരം വാക്കുകളിലൂടെ പുറത്തുവന്നതാണെന്നു മനോവ മനസ്സിലാക്കുന്നു! ജീവിച്ചിരുന്നപ്പോള്‍ 'തിരുമേനി' എന്നു വിളിക്കപ്പെട്ടവരുടെ ശരീരങ്ങള്‍, മരണാനന്തരം ഇരുപത്തിനാലു മണിക്കൂറെങ്കിലും കേടുകൂടാതെ നിലനിന്നില്ല എന്നത്, ഇക്കൂട്ടരുടെ രോഷം വര്‍ദ്ധിപ്പിക്കുന്നു!

ആരെയെങ്കിലുമൊക്കെ വിളിച്ചുകൂട്ടി സഭയുടെ അംഗബലം കൂട്ടുകയല്ല വേണ്ടത്. ഒരേ വിശ്വാസത്തിലും ബോധ്യത്തിലും പരിശുദ്ധാത്മാവിനാല്‍ നയിക്കപ്പെടുന്ന സമൂഹമായിരിക്കണം സഭ! ആദിമസഭയോളം അനുകരണീയമായ മറ്റൊരു മാതൃകയും ഇക്കാര്യത്തില്‍ ചൂണ്ടിക്കാണിക്കാന്‍ മനോവയുടെ മുന്നിലില്ല. മറ്റു സഭകളെ അവരുടെ ആചാരങ്ങളോടെ കത്തോലിക്കാസഭയിലേക്കു പ്രവേശിപ്പിക്കുവാന്‍ ആവേശം കാണിക്കുമ്പോള്‍ എന്തായിരുന്നു അപ്പസ്തോലിക സഭയെന്നു ബൈബിളില്‍ വിവരിച്ചിരിക്കുന്നത് ശ്രദ്ധിക്കുക: "വിശ്വസിച്ചവര്‍ എല്ലാവരും ഒറ്റ സമൂഹമാവുകയും തങ്ങള്‍ക്കുണ്ടായിരുന്നതെല്ലാം പൊതുവായിക്കരുതുകയും ചെയ്തു"(അപ്പ. പ്രവര്‍:2;44). ഒരു വചനംകൂടി നോക്കുക: "അവര്‍ ഏകമനസ്സോടെ താല്പര്യപൂര്‍വ്വം അനുദിനം ദൈവാലയത്തില്‍ ഒന്നിച്ചുകൂടുകയും ഭവനംതോറും അപ്പം മുറിക്കുകയും ഹൃദയലാളിത്യത്തോടും ആഹ്ലാദത്തോടുംകൂടെ ഭക്ഷണത്തില്‍ പങ്കുചേരുകയും ചെയ്തിരുന്നു. അവര്‍ ദൈവത്തെ സ്തുതിക്കുകയും എല്ലാ മനുഷ്യരുടെയും സംപ്രീതിക്കു പാത്രമാവുകയും ചെയ്തു. രക്ഷപ്രാപിക്കുന്നവരെ കര്‍ത്താവ് അവരുടെ ഗണത്തില്‍ പ്രതിദിനം ചേര്‍ത്തുകൊണ്ടിരുന്നു"(അപ്പ; പ്രവര്‍:2;46,47).

വിശ്വാസികളുടെ കൂട്ടായ്മയെ വ്യക്തമാക്കുന്ന മറ്റൊരു വചനം നോക്കുക: "വിശ്വാസികളുടെ സമൂഹം ഒരു ഹൃദയവും ഒരാത്മാവും ആയിരുന്നു"(അപ്പ. പ്രവര്‍:4;32). ഒരേ ആത്മാവിലും ഹൃദയത്തിലും നിന്ന്‍ വ്യത്യസ്ഥമായ ആശയങ്ങള്‍ വരുകയില്ല. അങ്ങനെ സംഭവിച്ചാല്‍, ഒരു വ്യക്തി തനിക്കെതിരെതന്നെ പോരാടുന്നതിനു തുല്യമാകും അത്! രക്ഷപ്രാപിക്കുന്നവരെ പ്രതിദിനം സഭയില്‍ ചേര്‍ക്കുന്നത് കര്‍ത്താവാണ്. അതുകൊണ്ടുതന്നെ വരുന്നവരുടെ സൗകര്യാര്‍ത്ഥം സഭയിലെ നിയമങ്ങളില്‍ അയവുവരുത്തേണ്ടതില്ല!

ഇവര്‍ മനുഷ്യരുടെ സംപ്രീതിക്കു പാത്രമായത് വിജാതിയത അനുകരിച്ചുകൊണ്ടോ അവരുടെ ദേവന്മാരെ ബഹുമാനിച്ചുകൊണ്ടോ ആയിരുന്നില്ല. ഏകമനസ്സോടെ ഇവര്‍ ജീവിച്ചുവെങ്കിലും ഒരു പ്രദേശത്തു മാത്രമായി ഒതുങ്ങിയ ഒരു സമൂഹമായിരുന്നില്ല എന്നും മനസ്സിലാക്കണം. ജറുസലെമിലെ ശ്രേഷ്ഠന്മാരുടെ ഉപദേശം അനുസരിക്കുന്ന പ്രാദേശിക നേതാക്കന്മാര്‍ ഓരോ സഭകള്‍ക്കുമുണ്ടായിരുന്നു. എന്നാല്‍, ഇന്നത്തെ കത്തോലിക്കാസഭയുടെ അവസ്ഥ ഇതല്ല! റോമില്‍നിന്നും പ്രഖ്യാപിക്കുന്ന നിയമങ്ങള്‍ ലത്തീന്‍സഭയ്ക്കു മാത്രമുള്ളതാണെന്നു പ്രചരിപ്പിച്ചുകൊണ്ട് തന്നിഷ്ടപ്രകാരം നിയമങ്ങള്‍ നിര്‍മ്മിക്കുന്ന സഭകളെ ഒരു സമൂഹമായി കരുതാന്‍ കഴിയില്ല. ഉദാഹരണത്തിന്: യോഗ അഭ്യസിക്കുന്നത് പൈശാചികമാണെന്നു കത്തോലിക്കാസഭ പ്രഖ്യാപിച്ചപ്പോള്‍, മുഴുവന്‍ സെമിനാരികളിലും ഇതു പരിശീലിപ്പിച്ചുകൊണ്ട്‌ സീറോമലബാര്‍സഭ റോമന്‍സഭയെ വെല്ലുവിളിക്കുന്നു! ഇതാണ് ഏകമനസ്സോടെയുള്ള ഒന്നിച്ചുകൂടലെങ്കില്‍ പരിഹാസ്യമായി മാത്രമേ കാണാന്‍ കഴിയൂ!

ദിവ്യകാരുണ്യത്തെ സംബന്ധിച്ചുള്ള കത്തോലിക്കാസഭയുടെ പരമ്പരാഗത വിശ്വാസത്തെ അട്ടിമറിക്കാന്‍ സീറോമലബാര്‍സഭയിലെ കല്‍ദായവാദികള്‍ നടത്തുന്ന രഹസ്യനീക്കങ്ങളുടെ മറനീക്കുമ്പോള്‍, എക്യുമെനിസത്തിന്‍റെ വരാനിരിക്കുന്ന ദുരന്തവും വെളിപ്പെടും.

റോമന്‍ കത്തോലിക്കാസഭയും ദിവ്യകാരുണ്യ ആരാധനയും!

കത്തോലിക്കാസഭയുടെ ചരിത്രത്തിലെ ഏറ്റവും വലിയ സമ്മേളനങ്ങളില്‍ ഒന്നായി അറിയപ്പെടുന്ന 'ത്രെന്തോസ്' സൂനഹദോസില്‍ ദിവ്യകാരുണ്യത്തിലുള്ള യേശുവിന്‍റെ നിത്യസാന്നിധ്യത്തെ അടിവരയിട്ടു പഠിപ്പിക്കുന്നുണ്ട്. 1545 ഡിസംബര്‍ 13-നും 1563 ഡിസംബര്‍ 4-നും ഇടയ്ക്ക് മൂന്നു മാര്‍പ്പാപ്പമാരുടെ ഭരണകാലങ്ങളിലായി നടന്ന ഇരുപത്തിയഞ്ചു സമ്മേളനങ്ങളാണ് ഈ സൂനഹദോസില്‍ ഉള്‍പ്പെടുന്നത്. വടക്കന്‍ ഇറ്റലിയിലുള്ള 'ആല്‍പ്സ്' താഴ്വാരത്തിലുള്ള 'ത്രെന്തോസ്' നഗരത്തിലാണ് മിക്കവാറും സമ്മേളനങ്ങള്‍ നടന്നത്. അതിനാലാണ് ഈ സൂനഹദോസിനു 'ത്രെന്തോസ്' സൂനഹദോസ് എന്ന പേരു ലഭിച്ചത്! പരിശുദ്ധ ദിവ്യകാരുണ്യത്തെക്കുറിച്ച് സൂനഹദോസിന്‍റെ പ്രഖ്യാപനം ഇപ്രകാരമായിരുന്നു: "ഏറ്റവും പരിശുദ്ധ ദിവ്യകാരുണ്യത്തില്‍ നമ്മുടെ കര്‍ത്താവിന്‍റെ ശരീരരക്തങ്ങള്‍ക്കൊപ്പം അപ്പത്തിന്‍റെയും വീഞ്ഞിന്‍റെയും പദാര്‍ത്ഥങ്ങള്‍ നിലനില്‍ക്കുന്നുവെന്നു പറയുകയും, പൂര്‍വഛായ നിലനില്‍ക്കെത്തന്നെ അപ്പത്തിന്‍റെയും വീഞ്ഞിന്‍റെയും മുഴുവന്‍ പദാര്‍ത്ഥത്തിനും യേശുവിന്‍റെ ശരീരരക്തങ്ങളായി സംഭവിക്കുന്ന അത്ഭുതകരവും അന്യാദൃശവും കത്തോലിക്കാസഭ തികഞ്ഞ ഔചിത്യത്തോടെ 'പദാര്‍ത്ഥാന്തരീകരണം' (transubstantiation) എന്നു വിളിക്കുന്നതുമായ പരിവര്‍ത്തനത്തെ നിഷേധിക്കുകയും ചെയ്യുന്നവന്‍ ആരായാലും ശപിക്കപ്പെട്ടവനാകട്ടെ"

ഈ പ്രഖ്യാപനത്തിനു വിരുദ്ധമായ പ്രചരണങ്ങളില്‍ ഏര്‍പ്പെടുന്ന ഏതൊരുവനും കത്തോലിക്കാസഭയുടെ ഭാഗമല്ല! കാരണം, ശപിക്കപ്പെട്ടവനെന്നു സഭ പ്രഖ്യാപിച്ചിരിക്കുന്ന ഒരുവനെ ചുമക്കാന്‍ കത്തോലിക്കാസഭയ്ക്കു ധാര്‍മ്മീകമായ ഉത്തരവാദിത്വമില്ല എന്നതുതന്നെ! ഇതിനു വിരുദ്ധമായ പ്രചരണത്തില്‍ ഏര്‍പ്പെട്ടിരിക്കുന്നവര്‍ ഇന്നും കത്തോലിക്കാസഭയുടെ ഭാഗമായി തുടരുന്നതിലെ വൈരുദ്ധ്യം ദുരൂഹമായി തുടരുന്നു! കത്തോലിക്കാസഭയുടെ ഈ വിശ്വാസപ്രഖ്യാപനത്തെ പരസ്യമായി തള്ളിപ്പറയുന്ന പുരോഹിതരെ മനോവയ്ക്കു നേരിട്ടറിയാം. തൊഴുത്തിലെ നിയമങ്ങള്‍ അനുസരിക്കാത്തവര്‍ക്ക് എങ്ങനെയാണ് അതില്‍ വസിക്കാന്‍ കഴിയുന്നത്? സീറോമലബാര്‍സഭയിലെ കല്‍ദായവാദികള്‍ കത്തോലിക്കാസഭയുടെ ദിവ്യകാരുണ്യ സംബന്ധമായ വിശ്വാസത്തിനു വിരുദ്ധമായ പ്രചാരണങ്ങള്‍ നടത്തുന്നവരാണ്. ഒരു പ്രത്യേക സമയത്തേയ്ക്കു മാത്രമേ പരിശുദ്ധ കുര്‍ബാനയില്‍ ക്രിസ്തുവിന്‍റെ സാന്നിദ്ധ്യമുള്ളുവെന്ന്‍ ഇക്കൂട്ടര്‍ വാദിക്കുന്നു. കത്തോലിക്കാ ദൈവാലയങ്ങളില്‍ പ്രഥമ സ്ഥാനത്തു സ്ഥാപിച്ചിരിക്കുന്ന ദിവ്യസക്രാരി അവിടെനിന്നു മാറ്റി, പകരം 'ക്ലാവര്‍'കുരിശ് അവിടെ സ്ഥാപിക്കാനുള്ള നീക്കത്തിന്‍റെ ഭാഗമാണ് ഈ പൈശാചിക വാദം! എന്നാല്‍, റോമന്‍ കത്തോലിക്കാസഭയുടെ വിശ്വാസപ്രഖ്യാപനമാണു സത്യമെന്ന് അദ്ഭുതങ്ങളിലൂടെയും അടയാളങ്ങളിലൂടെയും പരിശുദ്ധാത്മാവു സ്ഥിരീകരിക്കുന്നു!

പരിശുദ്ധ കുര്‍ബാനയിലുള്ള യേശുവിന്‍റെ സജ്ജീവ സാന്നിദ്ധ്യത്തേയും രൂപാന്തരീകരണത്തെയും സ്ഥിരീകരിക്കാന്‍ അനേകം അടയാളങ്ങള്‍ പരിശുദ്ധാത്മാവ് നല്‍കിക്കൊണ്ടിരിക്കുന്നു. ലോകത്താകമാനം നടക്കുന്ന ദിവ്യകാരുണ്യാദ്ഭുതങ്ങള്‍ ഇതിന്‍റെ ദൃഷ്ടാന്തങ്ങളാണ്! കത്തോലിക്കാസഭ അര്‍പ്പിക്കുന്ന കുര്‍ബാനകളില്‍ ഗോതമ്പപ്പവും മുന്തിരിച്ചാറും രൂപാന്തരീകരണത്തിലൂടെ യേശുവിന്‍റെ ശരീരരക്തങ്ങളായി മാറുന്നുവെന്നത് മിഥ്യാധാരണയല്ലെന്നും ജീവിക്കുന്ന സത്യമാണെന്നും പരിശുദ്ധാത്മാവു നല്‍കുന്ന സാക്ഷ്യമാണ് ഈ അദ്ഭുതങ്ങള്‍! വിശുദ്ധ കുര്‍ബാന ഒരു ബലിയല്ല, മറിച്ച് അന്ത്യത്താഴവേളയില്‍ യേശു നടത്തിയ വിരുന്നിനെ അനുസ്മരിപ്പിക്കുന്ന വിശുദ്ധ ഭോജനം മാത്രമാണെന്ന പ്രോട്ടസ്റ്റന്‍റ് വാദഗതിക്കാര്‍ പറയുന്നു. അവര്‍ മുറിക്കുന്ന അപ്പം അങ്ങനെയല്ലെന്നു മനോവ വാദിക്കുന്നില്ല. എന്നാല്‍, കത്തോലിക്കാസഭയുടെ ബലിയര്‍പ്പണം വെറുമൊരു വിരുന്നല്ല; കാല്‍വരിയില്‍ ക്രിസ്തു പൂര്‍ത്തിയാക്കിയ ബലിയുടെ പുനരവതരണമാണ്! യേശുവിന്‍റെ വചനത്തെ അടിസ്ഥാനമാക്കി അനുഷ്ഠിക്കുന്ന ബലിയെ, പരിശുദ്ധാത്മാവ് സ്ഥിരീകരിക്കുന്നത് അദ്ഭുതങ്ങളിലൂടെയും അടയാളങ്ങളിലൂടെയുമാണ്‌! ഇതുതന്നെയാണ് പരിശുദ്ധാത്മാവിന്‍റെ ദൌത്യങ്ങളില്‍ പ്രധാനപ്പെട്ടത്. വചനം ഇങ്ങനെ പറയുന്നു: "കര്‍ത്താവ് അവരോടുകൂടെ പ്രവര്‍ത്തിക്കുകയും അടയാളങ്ങള്‍ക്കൊണ്ടു വചനം സ്ഥിരീകരിക്കുകയും ചെയ്തിരുന്നു"(മര്‍ക്കോ:16;20).

യേശുവിന്‍റെ സ്വര്‍ഗ്ഗാരോഹണത്തിനുശേഷം അപ്പസ്തോലന്മാരിലൂടെ പ്രവര്‍ത്തിച്ചത് പരിശുദ്ധാത്മാവാണെന്നു നമുക്കറിയാം. അതിനാല്‍ത്തന്നെ വചനത്തെ സ്ഥിരീകരിക്കാന്‍ അദ്ഭുതങ്ങളും അടയാളങ്ങളും പ്രവര്‍ത്തിക്കുന്നത് ഈ ആത്മാവാണ്! സത്യസന്ധമായി വചനം പ്രസംഗിക്കുന്ന എല്ലായിടത്തും അടയാളങ്ങളും അദ്ഭുതങ്ങളും സംഭവിക്കുന്നതു കാണുമ്പോള്‍ ആരും അസ്വസ്ഥപ്പെട്ടിട്ടു കാര്യമില്ല! ദിവ്യകാരുണ്യ അദ്ഭുതങ്ങള്‍ കാണുമ്പോള്‍ ആവലാതിപ്പെടുന്നവരോടും മനോവയ്ക്കു പറയാനുള്ളത് ഇതുതന്നെയാണ്! വചനത്തിന്‍റെ സത്യത്തില്‍ നിലനിന്നുകൊണ്ട് കുരിശിലെ ബലിയെ അനുസ്മരിക്കുന്ന സഭ ഏതാണെന്നു തിരിച്ചറിയാന്‍ ഈ അദ്ഭുതങ്ങള്‍ മതിയായതാകുന്നു! കത്തോലിക്കാസഭയില്‍ ചേര്‍ന്നുനില്‍ക്കുമ്പോള്‍തന്നെ വിശുദ്ധ കുര്‍ബാനയെക്കുറിച്ചു വ്യത്യസ്ഥമായ വിശ്വാസങ്ങള്‍ വച്ചുപുലര്‍ത്തുന്ന പൗരസ്ത്യ റീത്തുകള്‍ അപകടകരമായ ആശയങ്ങള്‍ പ്രചരിപ്പിക്കുന്നു. ഇത്തരക്കാരുടെ ലക്ഷ്യം കത്തോലിക്കാസഭയെ നശിപ്പിക്കുകയെന്നതാണ്! ദിവ്യസക്രാരിയെ അവഗണിക്കുന്നവര്‍ ക്രിസ്തുവിന്‍റെ ശരീരരക്തങ്ങളെയാണ് അവഗണിക്കുന്നത്! യേശുവിന്‍റെ സജ്ജീവ സാന്നിദ്ധ്യം തിരിച്ചറിഞ്ഞതുകൊണ്ട് കത്തോലിക്കാസഭ ദിവ്യകാരുണ്യ ആരാധനയെ പ്രോത്സാഹിക്കുന്നു. എന്നാല്‍, കല്‍ദായവാദികള്‍ ഈ ആരാധനയെ നിഷേധിക്കാന്‍ രഹസ്യമായി പഠിപ്പിക്കുന്നു എന്നതാണു യാഥാര്‍ത്ഥ്യം!

പൗരസ്ത്യസഭകള്‍ കത്തോലിക്കാസഭയില്‍ ലയിച്ചത് പാഷാണ്ഡതകളെ പൂര്‍ണ്ണമായി ത്യജിച്ചുകൊണ്ടായിരുന്നില്ല എന്നതാണ് ഇവരുടെ മുറുമുറുപ്പുകള്‍ക്കു കാരണം. പഴയ 'നെസ്തോറിയന്‍' പാഷാണ്ഡതകള്‍ പൊടിതട്ടിയെടുക്കാന്‍ ഇവര്‍ ശ്രമിക്കുന്നതും ഗൗരവത്തോടെ കാണേണ്ടിയിരിക്കുന്നു. ദിവ്യകാരുണ്യ ആരാധനയെ രഹസ്യമായി എതിര്‍ക്കുന്നവരാണ് കത്തോലിക്കാസഭയിലുള്ള പൗരസ്ത്യസഭകളെങ്കില്‍, ഇതിനെ പരസ്യമായി പരിഹസിക്കുന്നവരാണ് മറ്റു പൗരസ്ത്യസഭകളും പ്രൊട്ടസ്റ്റന്‍റ് സഭകളും. ചുരുക്കത്തില്‍, ദിവ്യകാരുണ്യത്തിലെ യേശുവിന്‍റെ നിത്യസാന്നിദ്ധ്യത്തെ പൂര്‍ണ്ണമായി അംഗീകരിക്കുകയും ആരാധിക്കുകയും ചെയ്യുന്നത് ലത്തീന്‍ റീത്തു മാത്രമാണ്. സീറോമലബാര്‍മലബാര്‍ സഭയിലെ അനേകം വൈദീകരും ബഹുഭൂരിപക്ഷം വിശ്വാസികളും ഈ വിശ്വാസം പിന്തുടരുന്നുവന്നതും ശ്ലാഘനീയമാണ്! ലത്തീന്‍ റീത്തിന്‍റെ അടിയുറച്ച നിലപാടുകള്‍ക്ക് സ്വര്‍ഗ്ഗം അംഗീകാരമുദ്രയും നല്‍കിയിട്ടുണ്ട്! ലോകത്താകമാനം ഇന്നുവരെ നടന്നിട്ടുള്ള എല്ലാ ദിവ്യകാരുണ്യ അദ്ഭുതങ്ങളും ലത്തീന്‍ പള്ളികളിലോ, ഈ ക്രമത്തില്‍ ബലിയര്‍പ്പണം നടത്തിയ ഇടങ്ങളിലോ മാത്രമായത് കര്‍ത്താവു നല്‍കിയ അടയാളമാണ്!

ദൈവശാസ്ത്രപരമായ വാദഗതികള്‍ എത്രതന്നെ നിരത്തിയാലും കര്‍ത്താവ് അംഗീകാരമുദ്ര നല്‍കിയിരിക്കുന്നത് 'ലത്തീന്‍' ക്രമത്തിലുള്ള ബലിയര്‍പ്പണത്തിനാണെന്നു തറപ്പിച്ചു പറയാന്‍ ഈ അടയാളങ്ങള്‍ മാത്രം മതി!

ദിവ്യകാരുണ്യ അദ്ഭുതങ്ങള്‍!

ദിവ്യകാരുണ്യത്തെ സംബന്ധിച്ചുള്ള കത്തോലിക്കാസഭയുടെ പ്രഖ്യാപിതസത്യങ്ങളെ സ്ഥിരീകരിക്കുന്നതിനു സ്വര്‍ഗ്ഗം നല്‍കുന്ന അംഗീകരമുദ്രയാണ് ഓരോ ദിവ്യകാരുണ്യ അദ്ഭുതങ്ങളും! ക്രിസ്തുവിന്‍റെ ബലിയോടെ എന്നേക്കുമുള്ള ബലി അര്‍പ്പിച്ചു കഴിഞ്ഞതിനാല്‍, കത്തോലിക്കാസഭ അര്‍പ്പിക്കുന്ന ബലികള്‍ വെറും പ്രഹസനമാണെന്ന വിരുദ്ധസഭകളുടെ വാദം തികച്ചും നിരര്‍ത്ഥകമാണെന്നു ബൈബിള്‍ വായിച്ചിട്ടുള്ളവര്‍ക്കു മനസ്സിലാകും. യേശു അര്‍പ്പിച്ച യാഗബലി എല്ലാക്കാലത്തേക്കുമുള്ള ഏകബലിയാണ് എന്നകാര്യത്തില്‍ മനോവയ്ക്കു യാതൊരു സംശയവുമില്ല. എന്നാല്‍, അതിന്‍റെ അനുസ്മരണത്തിനു സ്വര്‍ഗ്ഗം അംഗീകാരം നല്‍കിയിട്ടുണ്ടെന്നും, ഇതൊരു കല്പനയാണെന്നും വചനത്തിന്‍റെ അടിസ്ഥാനത്തില്‍ മനസ്സിലാക്കാന്‍ കഴിയും. കര്‍ത്താവായ യേശുവിന്‍റെ വാഗ്ദാനം നിലനില്‍ക്കുന്നതുപോലെ, കുര്‍ബാനയിലെ അവിടുത്തെ സാന്നിദ്ധ്യവും മാറ്റമില്ലാത്ത ഒന്നാകുന്നു!

എന്നേക്കുമുള്ള ഏകബലി യേശു അര്‍പ്പിച്ചുകഴിഞ്ഞതിനാല്‍, ഇതിന്‍റെ പുനരവതരണം അനാവശ്യമാണെന്നു വാദിക്കുന്ന സഭകള്‍ക്ക് ഈ അബദ്ധധാരണ എവിടെനിന്നു ലഭിച്ചുവെന്ന് വ്യക്തമാക്കണം. അന്ത്യത്താഴവേളയില്‍ വിശുദ്ധ കുര്‍ബാന സ്ഥാപിച്ചുകൊണ്ട് യേശു പറഞ്ഞ വാക്കുകളിലേക്കു നമ്മുടെ ശ്രദ്ധതിരിക്കാം: "പിന്നെ അവന്‍ അപ്പമെടുത്ത്‌, കൃതജ്ഞതാസ്തോത്രംചെയ്ത്, മുറിച്ച്, അവര്‍ക്കു കൊടുത്തുകൊണ്ട് അരുളിച്ചെയ്തു: ഇത് നിങ്ങള്‍ക്കുവേണ്ടി നല്‍കപ്പെടുന്ന എന്‍റെ ശരീരമാണ്. എന്‍റെ ഓര്‍മ്മയ്ക്കായി ഇതു ചെയ്യുവിന്‍. അപ്രകാരംതന്നെ അത്താഴത്തിനുശേഷം അവന്‍ പാനപാത്രം എടുത്തുകൊണ്ട് അരുളിച്ചെയ്തു: ഈ പാനപാത്രം നിങ്ങള്‍ക്കുവേണ്ടി ചിന്തപ്പെടുന്ന എന്‍റെ രക്തത്തിലുള്ള പുതിയ ഉടമ്പടിയാണ്"(ലൂക്കാ:22;19,20). ഈ വെളിപ്പെടുത്തലിന്‍റെ വ്യക്തമായ വ്യാഖ്യാനം പൗലോസ് അപ്പസ്തോലന്‍ കോറിന്തോസിലെ സഭയ്ക്ക് കത്തിലൂടെ നല്‍കുന്നതു നോക്കുക: "കര്‍ത്താവായ യേശു, താന്‍ ഒറ്റിക്കൊടുക്കപ്പെട്ട രാത്രിയില്‍, അപ്പമെടുത്ത്, കൃതജ്ഞതയര്‍പ്പിച്ച തിനുശേഷം അതു മുറിച്ചുകൊണ്ട് അരുളിച്ചെയ്തു: ഇത് നിങ്ങള്‍ക്കുവേണ്ടിയുള്ള എന്‍റെ ശരീരമാണ്. എന്‍റെ ഓര്‍മ്മയ്ക്കായി നിങ്ങള്‍ ഇതു ചെയ്യുവിന്‍. അപ്രകാരംതന്നെ അത്താഴത്തിനുശേഷം പാനപാത്രമെടുത്ത്‌ അരുളിച്ചെയ്തു: ഇത് എന്‍റെ രക്തത്തിലുള്ള പുതിയ ഉടമ്പടിയാണ്; നിങ്ങള്‍ ഇതു പാനംചെയ്യുമ്പോഴെല്ലാം എന്‍റെ ഓര്‍മ്മയ്ക്കായി ചെയ്യുവിന്‍. നിങ്ങള്‍ ഈ അപ്പം ഭക്ഷിക്കുകയും ഈ പാനപാത്രത്തില്‍നിന്നു പാനം ചെയ്യുകയും ചെയ്യുമ്പോഴെല്ലാം കര്‍ത്താവിന്‍റെ മരണം, അവന്‍റെ പ്രത്യാഗമനംവരെ പ്രഖ്യാപിക്കുകയാണ് ചെയ്യുന്നത്"(1കോറി:11;23-26).

കര്‍ത്താവിന്‍റെ പ്രത്യാഗമനംവരെ അവിടുത്തെ അനുസ്മരിക്കുന്ന ഈ ശുശ്രൂഷയെ പുതുതലമുറക്കാര്‍ തള്ളിപ്പറയുന്നുണ്ടെങ്കില്‍, അവര്‍ കര്‍ത്താവിന്‍റെ മരണത്തെ തള്ളിപ്പറയുകയാണു ചെയ്യുന്നത്. ഒരു ദിവസം ഒരു തവണ മാത്രമേ ഈ അനുസ്മരണ ശുശ്രൂഷ പാടുള്ളുവെന്ന അബദ്ധമാണ് ഓര്‍ത്തഡോക്സ് സഭകള്‍ പരസ്യമായി വിളിച്ചുപറയുന്നതെങ്കില്‍, കത്തോലിക്കാസഭയിലെ പൗരസ്ത്യസഭകള്‍ രഹസ്യമായി ഇതിനെ പിന്താങ്ങുന്നു! വചനപരമായി യാതൊരു അടിസ്ഥാനവും ഇല്ലെന്നുമാത്രമല്ല, സാത്താന്‍റെ പ്രബോധനമാണിതെന്നു മനോവ അസന്ദിഗ്ദ്ധമായി പ്രഖ്യാപിക്കുന്നു! കാരണം, കര്‍ത്താവിന്‍റെ കുരിശുമരണത്തെക്കുറിച്ചുള്ള ഓര്‍മ്മ എത്രത്തോളം ഇല്ലാതാക്കുവാന്‍ സാധിക്കുന്നുവോ, അത്രത്തോളം പിശാചിനു മനുഷ്യരുടെമേല്‍ സ്വാധീനമുറപ്പിക്കുവാന്‍ കഴിയും! അതിനാല്‍ത്തന്നെ, അവനുള്ള സൗകര്യമൊരുക്കലിന്‍റെ ഭാഗമാണ് ഇത്തരം അബദ്ധപ്രചരണങ്ങള്‍! നാം കര്‍ത്താവിന്‍റെ നാമത്തില്‍ ഒരുമിച്ചുകൂടുമ്പോഴൊക്കെ ഇതു ചെയ്യണമെന്നാണ് അവിടുന്നു കല്പിച്ചത്. ഒരു ദിവസം ഒരുതവണ മാത്രമേ ഇങ്ങനെ സമ്മേളിക്കാവൂ എന്ന ദുരുദ്ദേശപരമായ പഠനം എവിടെനിന്നു ലഭിച്ചു?

മുറിക്കപ്പെടുന്ന അപ്പത്തില്‍ യേശുവിന്‍റെ സജ്ജീവസാന്നിദ്ധ്യത്തെ വ്യക്തമാക്കുന്ന വചനമാണ് പൌലോസ് തുടര്‍ന്നു വ്യക്തമാക്കിയിരിക്കുന്നത്. ആ വചനം ഇങ്ങനെ: "തന്മൂലം, ആരെങ്കിലും അയോഗ്യതയോടെ കര്‍ത്താവിന്‍റെ അപ്പം ഭക്ഷിക്കുകയും പാത്രത്തില്‍നിന്നു പാനംചെയ്യുകയും ചെയ്‌താല്‍ അവന്‍ കര്‍ത്താവിന്‍റെ ശരീരത്തിനും രക്തത്തിനും എതിരേ തെറ്റുചെയ്യുന്നു"(1കോറി:11;27). ശരീരരക്തങ്ങളായി രൂപാന്തരപ്പെടുന്നില്ലെങ്കില്‍ ഈ വചനത്തിനു യാതൊരു പ്രസക്തിയും ഇല്ലെന്നു കരുതേണ്ടിവരും!

കര്‍ത്താവിന്‍റെ പുനരാഗമനംവരെ തുടരേണ്ടതാണ് ഈ അനുസ്മരണബലി എന്നതിനു പ്രവാചകന്മാരുടെയും യേശുവിന്‍റെയും സാക്ഷ്യം ബൈബിളിലുണ്ട്. എന്തുകൊണ്ടാണ് ചിലരില്‍നിന്നും ഈ സത്യം നീക്കിക്കളയപ്പെട്ടതെന്നും നാം ചിന്തിക്കേണ്ടിയിരിക്കുന്നു. അന്ത്യകാലവുമായി ബന്ധപ്പെട്ട് ദാനിയേല്‍ പ്രവാചകന്‍ പ്രവചിച്ചിരിക്കുന്നതു നോക്കുക: "പകുതി ആഴ്ചത്തേക്ക് ബലിയും കാഴ്ചകളും അവന്‍ നിരോധിക്കും"(ദാനി:9;27). ഇതിനെക്കുറിച്ച് അപ്പസ്തോലനായ പൗലോസ് പറയുന്നത് ഇപ്രകാരമാണ്: "എന്തെന്നാല്‍, ആ ദിവസത്തിനുമുമ്പു വിശ്വാസത്യാഗമുണ്ടാവുകയും നാശത്തിന്‍റെ സന്താനമായ അരാജകത്വത്തിന്‍റെ മനുഷ്യന്‍ പ്രത്യക്ഷപ്പെടുകയും ചെയ്യേണ്ടിയിരിക്കുന്നു. ദൈവമെന്നു വിളിക്കപ്പെടുന്നതോ ആരാധനാവിഷയമായിരിക്കുന്നതോ ആയ എല്ലാറ്റിനെയും അവന്‍ എതിര്‍ക്കുകയും അവയ്ക്കുപരി തന്നെത്തന്നെ പ്രതിഷ്ഠിക്കുകയും ചെയ്യും"(2തെസലോ:2;3,4). ഇവിടെ ഉപയോഗിച്ചിരിക്കുന്ന വാക്കുകള്‍ സൂക്ഷമമായി നിരീക്ഷിച്ചാല്‍, ദൈവമെന്നു വിളിക്കപ്പെടുന്നതോ ആരാധനാവിഷയമായിരിക്കുന്നതോ ആയ എല്ലാറ്റിനെയും എന്നത് ഒരു വ്യക്തിയെ അല്ല സൂചിപ്പിക്കുന്നത് എന്നു വ്യക്തമാകും. ഇതൊരു വസ്തുവിനെ സൂചിപ്പിക്കുന്ന വാക്കുകളാണ്. വ്യക്തിയെയോ വ്യക്തികളെയോ സൂചിപ്പിക്കുമ്പോള്‍, ദൈവമെന്നു വിളിക്കപ്പെടുന്നവര്‍, ആരാധനാവിഷയമായിരിക്കുന്നവര്‍ തുടങ്ങിയ പ്രയോഗങ്ങള്‍ ആയിരിക്കും കുറിക്കുക! സഭയില്‍ ആരാധനാവിഷയമായിരിക്കുന്നതും ദൈവമെന്നു വിളിക്കപ്പെടുന്നതുമായ ഒന്നുമാത്രമേയുള്ളു; അതു തിരുവോസ്തിയിലെ ദിവ്യകാരുണ്യമാണ്!

ദാനിയേല്‍പ്രവാചകന്‍റെ ഒരു പ്രവചനംകൂടി കാണുക: "അവന്‍റെ സൈന്യം വന്ന്‍ ദൈവാലയവും കോട്ടയും അശുദ്ധമാക്കുകയും നിരന്തരദഹനബലി നിരോധിക്കുകയും ചെയ്യും. അവര്‍ വിനാശത്തിന്‍റെ മ്ലേച്ഛവിഗ്രഹം അവിടെ സ്ഥാപിക്കും"(ദാനി:11;31). മറ്റൊരു പ്രവചനം ഇങ്ങനെ: "നിരന്തര ദഹനബലി നിര്‍ത്തലാക്കുന്നതും, വിനാശകരമായ മ്ലേച്ഛത പ്രതിഷ്ഠിക്കപ്പെടുന്നതുമായ സമയം മുതല്‍ ആയിരത്തിയിരുനൂറ്റിത്തൊണ്ണൂറു ദിവസം ഉണ്ടാകും"(ദാനി:12;11).

ഇത്രയും വചനങ്ങള്‍ ഇവിടെ കുറിച്ചത്, അന്ത്യകാലത്തു സംഭവിക്കുമെന്ന് പ്രവാചകന്‍ പറഞ്ഞ കാര്യങ്ങള്‍ ഇപ്പോള്‍തന്നെ സംഭവിച്ചുകഴിഞ്ഞുവെന്ന വാദവുമായി ഇറങ്ങിയിരിക്കുന്ന സഭകള്‍ക്കും വ്യക്തികള്‍ക്കുമുള്ള മറുപടിയായിട്ടാണ്. നിരന്തര ദഹനബലി നിര്‍ത്തലാക്കുന്നത് കര്‍ത്താവിന്‍റെ മരണത്തോടെയായിരുന്നുവെങ്കില്‍ പൗലോസ് അപ്പസ്തോലന്‍ ഇത് ആവര്‍ത്തിക്കേണ്ട ആവശ്യമുണ്ടായിരുന്നില്ല! അരാജകത്വത്തിന്‍റെ മനുഷ്യന്‍ അഥവാ 'ആന്‍റിക്രൈസ്റ്റ്' പ്രത്യക്ഷപ്പെടുമ്പോള്‍, നിരന്തര ദഹനബലി നിര്‍ത്തലാക്കണമെങ്കില്‍ അന്ന്‍ അതുണ്ടാകണം. ഇല്ലാത്ത ഒന്ന്‍ നിര്‍ത്തലാക്കാന്‍ ആര്‍ക്കും കഴിയില്ല! അതുകൊണ്ടുതന്നെ, കര്‍ത്താവിന്‍റെ മരണം അവിടുത്തെ പ്രത്യാഗമനംവരെ പ്രഖ്യാപിക്കപ്പെടുമെന്നു പറഞ്ഞിരിക്കുന്നത് ഈ നിരന്തര ദഹനബലി തന്നെയാണ്. ഈ ബലിയില്‍ അര്‍പ്പിക്കപ്പെടുന്ന കാഴ്ചകളായ അപ്പത്തിലും വീഞ്ഞിലും അവിടുത്തെ സജ്ജീവസാന്നിദ്ധ്യം വെളിപ്പെടുത്തുവാന്‍ ദിവ്യകാരുണ്യത്തില്‍ അടയാളങ്ങള്‍ നല്‍കുന്നു! ഇത്തരത്തില്‍ നടന്നിട്ടുള്ള അദ്ഭുതങ്ങള്‍ കാണുവാന്‍ അനേകര്‍ക്കു ലഭിച്ചതുപോലുള്ള ഭാഗ്യം മനോവയ്ക്കും ലഭിച്ചു.

ദിവ്യകാരുണ്യ അദ്ഭുതങ്ങള്‍ എന്തുകൊണ്ട് റോമന്‍സഭയില്‍ മാത്രം?

ഇതു വളരെ ഗൗരവത്തോടെ ചിന്തിക്കേണ്ട ഒരു വിഷയമാണ്. നസ്രത്തില്‍ എന്തുകൊണ്ട് അദ്ഭുതം പ്രവര്‍ത്തിക്കാന്‍ കര്‍ത്താവിനു കഴിഞ്ഞില്ല എന്ന യാഥാര്‍ത്ഥ്യത്തെക്കുറിച്ചു ധ്യാനിച്ചാല്‍ ഇതിനുള്ള ഉത്തരം ലഭിക്കും!

കേരളത്തിലടക്കം ലോകത്താകമാനം ആയിരക്കണക്കിനു സ്ഥലങ്ങളില്‍ ദിവ്യകാരുണ്യ അദ്ഭുതം നടന്നിട്ടുണ്ട്. തിരുവോസ്തി മാംസമായതും കാസായിലെ വീഞ്ഞു രക്തമായതുമായ അനേകം അദ്ഭുതങ്ങള്‍ ഔദ്യോഗികമായി സഭ സ്ഥിരീകരിച്ചിട്ടുമുണ്ട്. ശാസ്ത്രീയ പരീക്ഷണങ്ങളില്‍, ഇവയെല്ലാം ഒരേ രക്തം തന്നെയാണെന്നും മനസ്സിലാക്കാന്‍ കഴിഞ്ഞു. പലയിടങ്ങളിലും സാധാരണക്കാരായ ഭക്തരുടെ നാവുകളില്‍ സ്വീകരിച്ചതിനുശേഷമായിരുന്നു ഈ അദ്ഭുതം സംഭവിച്ചിട്ടുള്ളത്! രണ്ടുലക്ഷത്തോളം ആളുകള്‍ സമ്മേളിച്ച പോട്ടാ ബൈബിള്‍ കണ്‍വന്‍ഷനില്‍ വച്ച് റാണി മരിയ ജോണ്‍ എന്ന സ്ത്രീയുടെ നാവില്‍ ദിവ്യകാരുണ്യ അദ്ഭുതം സംഭവിച്ചത് മലയാളികള്‍ മറന്നിട്ടുണ്ടാകാന്‍ സാധ്യതയില്ല! എങ്കിലും, ഇവയെയെല്ലാം വിമര്‍ശിക്കുന്ന ചിലര്‍ കത്തോലിക്കാസഭയില്‍ ഉണ്ടെന്നതും മനോവ വിസ്മരിക്കുന്നില്ല! കേരളത്തിലെ കല്‍ദായവാദികളാണ് ഇത്തരം ശപിക്കപ്പെട്ട പ്രചരണങ്ങളുമായി ഊരുചുറ്റുന്നത് എന്നകാര്യം നമുക്കെല്ലാം അറിയാം! ഇവരുടെ ഈ വിധ്വംസകപ്രവര്‍ത്തനങ്ങളുടെ യഥാര്‍ത്ഥ കാരണം 'അസൂയ' എന്ന ഒറ്റവാക്കില്‍ ഒതുക്കിനിര്‍ത്താന്‍ കഴിയില്ല! കാരണങ്ങളില്‍ ഒന്നുമാത്രമാണിത്!

ഇക്കാലമത്രയും നടന്നിട്ടുള്ള ദിവ്യകാരുണ്യ അദ്ഭുതങ്ങളില്‍ ഒന്നുപോലും കല്‍ദായ ക്രമത്തില്‍ ബലിയര്‍പ്പിച്ച വേളകളില്‍ സംഭവിച്ചിട്ടില്ല എന്നതാണ് ഇവരുടെ അമര്‍ഷത്തിന്‍റെ പ്രധാന കാരണം. ലത്തീന്‍ ക്രമത്തില്‍ ദിവ്യബലി അര്‍പ്പിക്കുമ്പോഴും ജനാഭിമുഖ ബലിയര്‍പ്പണത്തിലുമാണ് എല്ലാ ദിവ്യകാരുണ്യ അദ്ഭുതങ്ങളും സംഭവിച്ചിട്ടുള്ളത്! ഇത് ഈ വൈദീകര്‍ മറ്റുള്ളവരേക്കാള്‍ ശ്രേഷ്ഠരായതുകൊണ്ടോ മറ്റുള്ളവര്‍ നികൃഷ്ടരായതുകൊണ്ടോ ആണെന്നു മനോവ കരുതുന്നില്ല! എന്നാല്‍, ഇതിനു വ്യക്തമായ കാരണമുണ്ടെന്ന യാഥാര്‍ത്ഥ്യം മറച്ചുവയ്ക്കാനും കഴിയില്ല! ഈ കാരണത്തെക്കുറിച്ചാണ്, നസ്രത്തിലെ സംഭവവുമായി സാമ്യമുണ്ടെന്നു മനോവ മുന്‍പേ സൂചിപ്പിച്ചത്!

കര്‍ത്താവായ യേശുവിന്, അവിടുത്തെ ജന്മദേശമായ നസ്രത്തില്‍ അദ്ഭുതങ്ങള്‍ പ്രവര്‍ത്തിക്കാന്‍ കഴിയാതെപോയത് എന്തുകൊണ്ടാണെന്നു ബൈബിളില്‍ പറയുന്നുണ്ട്. അവിടെ ഇങ്ങനെയാണ് കുറിച്ചിരിക്കുന്നത്: "അവരുടെ അവിശ്വാസം നിമിത്തം അവന്‍ അവിടെ അധികം അദ്ഭുതങ്ങള്‍ പ്രവര്‍ത്തിച്ചില്ല"(മത്താ:13;58). കര്‍ത്താവായ യേശു അദ്ഭുതങ്ങള്‍ പ്രവര്‍ത്തിക്കാന്‍ തയ്യാറാകാത്തത് അവരുടെ അവിശ്വാസം നിമിത്തമായിരുന്നുവെന്ന് ഇവിടെ വ്യക്തമാക്കുന്നു. ലത്തീന്‍സഭയിലെ വൈദീകര്‍ പൗരസ്ത്യസഭയിലെ വൈദീകരേ അപേക്ഷിച്ച് വിശ്വാസത്തിന്‍റെ നിറകുടങ്ങളാണെന്നു പറയാനുള്ള അജ്ഞത മനോവയ്ക്കില്ല! എന്നാല്‍, വ്യക്തികളെയല്ല, അവര്‍ പ്രതിനിധാനം ചെയ്യുന്ന സഭയുടെ വിശ്വാസത്തെയും വിശ്വാസപ്രഖ്യാപനത്തെയുമാണ് കര്‍ത്താവു പരിഗണിച്ചത്. ദിവ്യകാരുണ്യത്തിന്, അത് അര്‍ഹിക്കുന്ന ആദരവും ആരാധനയും നല്‍കാന്‍ പാശ്ചാത്യസഭ തയ്യാറായപ്പോള്‍, പരിശുദ്ധാത്മാവ് ആ സഭയില്‍ അദ്ഭുതങ്ങള്‍ നടത്തുന്നു. ഇതുകണ്ട് കല്‍ദായര്‍ അസ്വസ്ഥപ്പെടുമ്പോള്‍, മനോവയ്ക്കു പറയാനുള്ളത് ഒരു വചനമാണ്. ലോകചരിത്രത്തിലെ ആദ്യത്തെ ബലിയായി നാം മനസ്സിലാക്കുന്നത് കായേനും ആബേലും അര്‍പ്പിച്ച ബലികളാകുന്നു. അവിടെ ഒരുവന്‍റെ ബലി സ്വീകാര്യമാവുകയും അപരന്‍റേതു തിരസ്കൃതമാവുകയും ചെയ്തു. കായേന്‍റെ ബലിയില്‍ കര്‍ത്താവു പ്രസാദിക്കാത്തത്തില്‍ അവന്‍ കോപാകുലനായപ്പോള്‍ അവിടുന്ന് പറയുന്നതു നോക്കുക: "നീ കോപിച്ചിരിക്കുന്നതെന്തുകൊണ്ട്? നിന്‍റെ മുഖം വാടിയിരിക്കുന്നതെന്തുകൊണ്ട്? ഉചിതമായി പ്രവര്‍ത്തിച്ചാല്‍ നീയും സ്വീകാര്യനാവുകയില്ലേ? നല്ലതു ചെയ്യുന്നില്ലെങ്കില്‍ പാപം വാതില്‍ക്കല്‍ത്തന്നെ പതിയിരിപ്പുണ്ടെന്ന്‍ ഓര്‍ക്കണം. അതു നിന്നില്‍ താത്പര്യം വച്ചിരിക്കുന്നു; നീ അതിനെ കീഴടക്കണം"(ഉല്‍പ:4;6,7).

അര്‍പ്പിക്കപ്പെടുന്ന അപ്പത്തിലും വീഞ്ഞിലും സജ്ജീവനായി കടന്നുവരുന്ന യേശുവിനെ അംഗീകരിക്കാതെ, ദിവ്യസക്രാരി അപ്രധാന സ്ഥാനത്തേക്കു മാറ്റിവയ്ക്കുകയും പകരം 'ക്ലാവര്‍'കുരിശിനെ പ്രധാനമായി പരിഗണിക്കുകയും ചെയ്യുമ്പോള്‍, കായേനെപ്പോലെ തിരസ്കൃതനായാല്‍ അദ്ഭുതപ്പെടേണ്ടതില്ല! ഉചിതമായി പ്രവര്‍ത്തിച്ചാല്‍ നിങ്ങളും സ്വീകാര്യരാകും! ദിവ്യകാരുണ്യത്തിന് അര്‍ഹിക്കുന്ന പരിഗണന നല്‍കുന്നില്ല എന്നതു മാത്രമല്ല കല്‍ദായരുടെ ബലിയിലെ അപാകത. ദൈവവചനത്തിനു വിരുദ്ധമായ അനേകം ആചാരങ്ങള്‍ കൂട്ടിക്കലര്‍ത്തിയതും ബലി അസ്വീകാര്യമാകാന്‍ കാരണമായിട്ടുണ്ട്. ഇത്തരത്തിലുള്ള അനാചാരങ്ങളും, അവയ്ക്ക് പൗരസ്ത്യവാദികള്‍ നല്‍കുന്ന അപക്വമായ വ്യാഖ്യാനങ്ങളും നമുക്കു പരിശോധിക്കാം.

തിരശ്ശീലയ്ക്കുള്ളിലെ രഹസ്യം!

യഹൂദരുടെ പാരമ്പര്യങ്ങള്‍ തുടരുന്ന രീതി ക്രൈസ്തവര്‍ക്കുണ്ടെങ്കിലും യേശുവിന്‍റെ വരവിനുശേഷം ആചാരങ്ങളില്‍ ചില മാറ്റങ്ങള്‍ വന്നിട്ടുണ്ട്. ആടുകളെയും, പ്രാവുകളെയും, ധാന്യങ്ങളും മറ്റും അഗ്നിയില്‍ ദഹിപ്പിക്കുന്ന രീതിയായിരുന്നു യഹൂദര്‍ അര്‍പ്പിച്ചിരുന്ന ബലികള്‍ എന്നു നമുക്കറിയാം. എന്നാല്‍, സ്വപുത്രനെ ബലിയര്‍പ്പിച്ചതിലൂടെ മറ്റു ബലികള്‍ ഇനിയും അര്‍പ്പിക്കേണ്ട ആവശ്യമില്ലാതായി! ഇനി അര്‍പ്പിക്കപ്പെടേണ്ടത് യേശുവിന്‍റെ ബലിയുടെ അനുസ്മരണം മാത്രമാകുന്നു. ഇത് എപ്രകാരമാണ് അനുസ്മരിക്കേണ്ടാതെന്ന്‍ അന്ത്യത്താഴവേളയില്‍ അവിടുന്നു നമ്മെ പഠിപ്പിച്ചു! അതുകൊണ്ടാണ്, അന്ത്യത്താഴ ശുശ്രൂഷയെ അനുകരിച്ചുകൊണ്ട് ക്രൈസ്തവര്‍ ബലിയര്‍പ്പിക്കുന്നത്. പാശ്ചാത്യമെന്നോ പൗരസ്ത്യമെന്നോ വ്യത്യാസമില്ലാതെ, എല്ലാ അപ്പസ്തോലിക സഭകളും ഈ ശൈലിയാണു പിന്തുടരുന്നത്. എന്നാല്‍, ബലിയര്‍പ്പണത്തിലെ അനുഷ്ഠാനങ്ങളിലുള്ള ചില വൈരുദ്ധ്യങ്ങള്‍ ഇരുവിഭാഗങ്ങളുടെയും ബലികളെ വ്യത്യസ്ഥമാക്കുന്നു!

'കലാനിലയം' നാടകവേദിയുടെ ഭീകരനാടകത്തെ അനുസ്മരിപ്പിക്കുന്ന വിധത്തില്‍ അള്‍ത്താരയുടെ മുന്‍വശം തിരശ്ശീലയിട്ടു മറയ്ക്കുന്ന പതിവ് പൗരസ്ത്യസഭകള്‍ പിന്തുടരുന്നു. ജറുസലേം ദൈവാലയത്തില്‍ ഇത്തരത്തില്‍ ഒരു തിരശ്ശീലയുണ്ടായിരുന്നു എന്നതാണ് ഇവര്‍ ഇതിനു നല്‍കുന്ന വിശദ്ദീകരണം! ബലിയര്‍പ്പണത്തില്‍ ഉണ്ടായിരുന്ന രഹസ്യസ്വഭാവങ്ങളെ മുഴുവന്‍, പരസ്യമായി തന്‍റെ ശരീരം അര്‍പ്പിച്ച കര്‍ത്താവായ യേശു നീക്കിക്കളഞ്ഞു! ഇനിയും രഹസ്യങ്ങളൊന്നും അവശേഷിക്കുന്നില്ല എന്നതിനു സ്വര്‍ഗ്ഗത്തിലെ ദൈവം ദൃഷ്ടാന്തവും നല്‍കി! കാല്‍വരിയില്‍ ബലിയര്‍പ്പണം നടന്നപ്പോള്‍, ജറുസലേമിലെ ദൈവാലയത്തിലാണ് ഈ ദൃഷ്ടാന്തം നല്‍കിയത്. എന്തായിരുന്നു ആ ദൃഷ്ടാന്തമെന്ന്‍ ബൈബിള്‍ വ്യക്തമാക്കുന്നതു നോക്കുക: "യേശു ഉച്ചത്തില്‍ നിലവിളിച്ചുകൊണ്ടു ജീവന്‍ വെടിഞ്ഞു. അപ്പോള്‍ ദൈവാലയത്തിലെ തിരശ്ശീല മുകള്‍മുതല്‍ താഴെവരെ രണ്ടായി കീറി"(മത്താ:27;50,51). മനുഷ്യരാണ് അതു കീറിയതെങ്കില്‍, താഴെമുതല്‍ മുകളിലോട്ടു കീറാനേ സാധിക്കുമായിരുന്നുള്ളു. എന്നാല്‍, മുകള്‍മുതല്‍ താഴെവരെ കീറി എന്നു വ്യക്തമായി കുറിച്ചുവച്ചത് നിസ്സാരമായി കരുതരുത്! സ്വര്‍ഗ്ഗത്തിലെ ദൈവം നീക്കിക്കളഞ്ഞ തിരശ്ശീലയുമായി ഇപ്പോഴും കറങ്ങുന്നവര്‍, ക്രിസ്തുവിനെ യഥാര്‍ത്ഥമായി അറിയാത്തവരും പുതിയ ബലിയുടെ മാഹാത്മ്യവും സത്യവും തിരിച്ചറിയാത്തവരുമാണ്!

വിശുദ്ധസ്ഥലം, അതിവിശുദ്ധസ്ഥലം എന്നിങ്ങനെ രണ്ടുഭാഗങ്ങള്‍ ദൈവാലയത്തിലുണ്ടായിരുന്നു. ഇവയെ തമ്മില്‍ വേര്‍തിരിക്കുന്ന വിരിയാണ് തിരശ്ശീല! പുരോഹിതന്മാര്‍ എല്ലാദിവസവും വിശുദ്ധസ്ഥലത്തു ശുശ്രൂഷ ചെയ്തിരുന്നുവെങ്കിലും അതിവിശുദ്ധസ്ഥലത്ത് ഇവര്‍ക്കു പ്രവേശനാനുമതി ഉണ്ടായിരുന്നില്ല. പ്രധാനപുരോഹിതന്‍മാത്രം അവിടെ പ്രവേശിച്ച് ആണ്ടിലൊരിക്കല്‍ ബലിരക്തം സമര്‍പ്പിക്കും. വചനം നോക്കുക: "രണ്ടാമത്തെ കൂടാരത്തിലാകട്ടെ, പ്രധാനപുരോഹിതന്‍മാത്രം തനിക്കുവേണ്ടിയും ജനത്തിന്‍റെ തെറ്റുകള്‍ക്കുവേണ്ടിയും അര്‍പ്പിക്കാനുള്ള രക്തവുമായി ആണ്ടിലൊരിക്കല്‍ പ്രവേശിക്കുന്നു"(ഹെബ്രാ:9;7). എന്നാല്‍, എന്നേക്കുമുള്ള ഏകബലിയായി തന്നെത്തന്നെ സമര്‍പ്പിച്ച നിത്യപുരോഹിതനായ യേശു ആ ബലി പൂര്‍ത്തിയാക്കി! അതിനാല്‍ത്തന്നെ, ഇപ്പോള്‍ അര്‍പ്പിക്കപ്പെടുന്ന ബലികള്‍, യേശുവിന്‍റെ ബലിയുടെ അനുസ്മരണം മാത്രമാണ്! വിശുദ്ധസ്ഥലവും അതിവിശുദ്ധസ്ഥലവും രണ്ടു കാലഘട്ടങ്ങളുടെ പ്രതീകങ്ങളായിരുന്നുവെന്ന് അപ്പസ്തോലന്‍ വ്യക്തമാക്കുന്നു: "ഈ കാലഘട്ടത്തിന്‍റെ പ്രതീകമായ ആദ്യത്തെ കൂടാരം നിലനില്‍ക്കുന്നിടത്തോളം കാലം ശ്രീകോവിലിലേക്കുള്ള പാത തുറക്കപ്പെട്ടിട്ടില്ലെന്നു പരിശുദ്ധാത്മാവ് ഇതിനാല്‍ വ്യക്തമാക്കുന്നു. അര്‍പ്പിക്കുന്നവന്‍റെ അന്തഃകരണത്തെ വിശുദ്ധീകരിക്കാന്‍ കഴിവില്ലാത്ത കാഴ്ചകളും ബലികളുമാണ് ഇപ്രകാരം സമര്‍പ്പിക്കുന്നത്"(ഹെബ്രാ:9;9).

അപൂര്‍ണ്ണമായിരുന്ന എല്ലാ ബലികളെയും പൂര്‍ണ്ണമാക്കാന്‍ ഒരു ബലി അനിവാര്യമായിരുന്നു. പൂര്‍ണ്ണതയുടെ ബലിയര്‍പ്പിച്ച പുരോഹിതനും ബലിവസ്തുവും ഒരുവന്‍തന്നെയായിരുന്നു എന്ന്‍ നമുക്കറിയാം. വചനം ശ്രദ്ധിക്കുക: "എന്നാല്‍, വരാനിരിക്കുന്ന നന്മകളുടെ പ്രധാനപുരോഹിതനായി ക്രിസ്തു പ്രത്യക്ഷപ്പെട്ടു. കൂടുതല്‍ മഹനീയവും പൂര്‍ണ്ണവും മനുഷ്യനിര്‍മ്മിതമല്ലാത്തതും സൃഷ്ടവസ്തുക്കളില്‍പ്പെടാത്തതുമായ കൂടാരത്തിലൂടെ എന്നേക്കുമായി ശ്രീകോവിലില്‍ അവന്‍ പ്രവേശിച്ചു"(ഹെബ്രാ:9;11). യേശുവിന്‍റെ ബലിയിലൂടെ പഴയതും പുതിയതുമായ കാലഘട്ടങ്ങളുടെ വേര്‍തിരിവ് ഇല്ലാതായി. തിരശ്ശീലയെ കീറിക്കൊണ്ട് ഇതിനുള്ള ദൃഷ്ടാന്തം നമുക്കു നല്‍കിയത് പിതാവായ ദൈവമാണ്! പഴയനിയമകാലത്തു മരിച്ച നീതിമാന്മാരോടൊപ്പം കര്‍ത്താവിനോടൊപ്പം ക്രൂശിക്കപ്പെട്ട നല്ല കള്ളനെയും ഒരേ ദിവസം പറുദീസയില്‍ ചേര്‍ക്കാന്‍ കര്‍ത്താവു തിരുമനസ്സായി. കാലഘട്ടങ്ങളുടെ വേര്‍തിരിവ് യേശു ഇല്ലാതാക്കിയെങ്കില്‍, ഈ തിരശ്ശീല ഇനി ആവശ്യമില്ല!

തങ്ങളുടെ അപാകതകള്‍ തിരിച്ചറിഞ്ഞ്, ഉചിതമായതു പ്രവര്‍ത്തിച്ചാല്‍ നിങ്ങളും സ്വീകാര്യരാകും! കര്‍ത്താവു കീറിക്കളഞ്ഞ തിരശ്ശീല തുന്നിക്കൂട്ടാന്‍ തുനിയാതെ, അവിടുത്തെ തീരുമാനങ്ങളോടു വിധേയപ്പെടുക!

ജനാഭിമുഖവും അല്ലാതെയും!

ലത്തീന്‍ ക്രമത്തില്‍ ജനങ്ങള്‍ക്ക് അഭിമുഖമായി പുരോഹിതന്‍ നില്‍ക്കുമ്പോള്‍, പൗരസ്ത്യസഭകളിലെ പുരോഹിതര്‍ ജനങ്ങള്‍ക്കു പുറംതിരിഞ്ഞു നിന്നാണു കുര്‍ബാനയര്‍പ്പിക്കുന്നത്! ഓരോ വിഭാഗവും താന്താങ്ങളുടെ വശങ്ങള്‍ ന്യായീകരിക്കാറുമുണ്ട്. ഈ വിഷയത്തില്‍ മനോവയുടെ അഭിപ്രായം ദൈവവചനത്തെ അടിസ്ഥാനമാക്കി വെളിപ്പെടുത്തുന്നതിനുമുമ്പ് കല്‍ദായവാദികളുടെ ന്യായീകരണം നോക്കാം.

ജനത്തിനുവേണ്ടി അവരുടെ പ്രതിനിധിയായി പുരോഹിതന്‍ ദൈവസന്നിധിയില്‍ ബലിയര്‍പ്പിക്കുന്നതുകൊണ്ടാണ്, കല്‍ദായ പുരോഹിതര്‍ പുറംതിരിഞ്ഞു നില്‍ക്കുന്നതെന്ന വാദമാണ് ഇവര്‍ ഉയര്‍ത്തുന്നത്. ജനങ്ങളുടെ പ്രതിനിധിയായതിനാല്‍, ജനങ്ങളില്‍ ഒരുവനെപ്പോലെ പുരോഹിതനും അള്‍ത്താരയിലേക്കു തിരിഞ്ഞു നില്‍ക്കുന്നു! കൂടുതല്‍ വിശകലനത്തിലേക്കു കടക്കാന്‍ ആഗ്രഹിക്കാത്ത ഒരുവനെ സംബന്ധിച്ചിടത്തോളം വളരെ അര്‍ത്ഥവത്തും സ്വീകാര്യവുമായ ഒരു വാദമാണിത്. പഴയനിയമകാലത്ത് പുരോഹിതന്‍ ജനങ്ങള്‍ക്കുവേണ്ടി ബലിയര്‍പ്പിച്ചതിനെ അനുസ്മരിച്ചാണ് ഇന്നും ബലിയര്‍പ്പണം നടത്തുന്നതെങ്കില്‍, ഈ വാദത്തെ പൂര്‍ണ്ണമനസ്സോടെ മനോവ സ്വീകരിക്കുമായിരുന്നു! എന്നാല്‍, ക്രിസ്തുവിന്‍റെ ബലിയുടെ ഓര്‍മ്മ പുതുക്കലാണു കത്തോലിക്കാസഭയുടെ ബലിപീഠങ്ങളില്‍ നടക്കുന്നതെങ്കില്‍ കല്‍ദായവാദത്തെ അടിമുതല്‍ മുടിവരെ മനോവ തള്ളിക്കളയുന്നു! ഈ തള്ളിക്കളയലിനു വ്യക്തമായ കാരണങ്ങളുണ്ട്. ആ കാരണങ്ങള്‍ എന്താണെന്നു മനോവ വ്യക്തമാക്കാം.

പഴയനിയമത്തിലെ പുരോഹിതന്‍ അഹറോന്‍റെ പിന്‍ഗാമിയായിരുന്നു എന്നകാര്യം നമുക്കറിയാം. എന്നാല്‍, പുതിയനിയമത്തിലെ പുരോഹിതന്‍ അഹറോന്‍റെ പിന്‍ഗാമിയല്ല; മറിച്ച്, ക്രിസ്തുവിന്‍റെ പ്രതിപുരുഷനാണ്! അവന്‍ ക്രിസ്തുവിന്‍റെ പ്രതിനിധിയായി നിന്നുകൊണ്ട് ജനങ്ങള്‍ക്കുവേണ്ടി അവിടുത്തെ ശരീരം പങ്കിട്ടു നല്‍കുകയാണു ചെയ്യുന്നത്. യേശു നമുക്കുവേണ്ടി ബലിയര്‍പ്പിച്ചത് മുഖാമുഖമായിരുന്നോ എന്ന്‍ അറിയണമെങ്കില്‍ കാല്‍വരിയിലെ കുരിശിലേക്കു നോക്കണം! കുരിശിലേക്കു നോക്കി, ഈ സത്യം അറിയാതിരിക്കാന്‍, കല്‍ദായകുബുദ്ധികള്‍ ക്രൂശിതരൂപത്തെയും നിഷേധിക്കുന്നു! ജനങ്ങള്‍ക്ക് അഭിമുഖമായി കുരിശില്‍ തൂങ്ങിക്കിടന്നുകൊണ്ടാണ് കര്‍ത്താവായ യേശു ബലിയര്‍പ്പിച്ചത്. മാത്രവുമല്ല, തന്‍റെ ശരീരം പങ്കുവച്ചു നല്‍കുന്നതിന്‍റെ പ്രതീകമായി അപ്പം മുറിച്ചു നല്‍കിയതും പുറംതിരിഞ്ഞു നിന്നായിരുന്നില്ല. അങ്ങനെയെങ്കില്‍, പെസഹായും കുരിശിലെ ബലിയും ഒരേ വേദിയില്‍ അനുസ്മരിക്കുന്ന പരിശുദ്ധ കുര്‍ബാന എങ്ങനെയാണ് ക്രിസ്തുവിന്‍റെ പ്രതിപുരുഷന്‍ അര്‍പ്പിക്കേണ്ടത്? യഹൂദ പുരോഹിതരെയാണോ ക്രിസ്തുവിനെയാണോ ക്രിസ്ത്യാനികള്‍ അനുകരിക്കേണ്ടത്?

ജനാഭിമുഖ കുര്‍ബാനയ്ക്കെതിരേ കല്‍ദായവാദികളുടെ 'മിഡില്‍ഈസ്റ്റിലെ' വക്താവിന്‍റെ പരിഹാസം മനോവയുടെ ശ്രദ്ധയില്‍പ്പെട്ടു. റോമന്‍ കത്തോലിക്കാ വൈദീകരെക്കുറിച്ച് കര്‍ത്താവിനു പുറംതിരിഞ്ഞു നില്‍ക്കുന്നവര്‍ എന്നാണ് ഇയാള്‍ പരിഹസിച്ചത്! കല്‍ദായരുടെ പള്ളികളില്‍ കര്‍ത്താവിനുള്ള ഇരിപ്പിടം എവിടെയാണെന്നു നമുക്കറിയാം. അള്‍ത്താരയുടെ ഒരു മൂലയില്‍ സ്ഥാപിച്ചിരിക്കുന്ന 'വീഞ്ഞപ്പെട്ടി'യിലാണു കര്‍ത്താവിനുള്ള സ്ഥാനം! ജനാഭിമുഖം ബലിയര്‍പ്പിക്കുന്ന ഒരു പുരോഹിതന്‍റെ പിന്‍ഭാഗത്തുള്ളത് ഈസാനബി 'എസ്കേപ്പ്' ചെയ്തുപോയ 'ക്ലാവര്‍'കുരിശാണ്! ഈ കുരിശിനെ ക്രിസ്ത്യാനികളാരും ബഹുമാനിക്കുന്നുമില്ല!

റോമന്‍ കത്തോലിക്കാസഭയില്‍ കേന്ദ്രഭാഗത്ത് പ്രതിഷ്ഠിച്ചിരിക്കുന്ന ദിവ്യസക്രാരിക്കു മുന്നില്‍ നിന്നുകൊണ്ട് ബലിയര്‍പ്പിക്കുന്ന പുരോഹിതന്‍ കര്‍ത്താവിനുവേണ്ടിയുള്ള ജനത്തിന്‍റെ ശുശ്രൂഷകനാണ്! സക്രാരി തുറന്നുവച്ചല്ല അവിടെ ബലിയര്‍പ്പണം നടത്തുന്നതെന്ന കാര്യവും കല്‍ദായര്‍ ശ്രദ്ധിച്ചിട്ടുണ്ടാകും! നിത്യപുരോഹിതനായ യേശുവിന്‍റെ പ്രതിനിധിയായി, അവിടുത്തേക്കുവേണ്ടി നിലകൊള്ളുന്നവന്‍ നില്‍ക്കേണ്ട സ്ഥാനം അതുതന്നെയാണ്. താന്‍, യേശുവിന്‍റെ പ്രതിപുരുഷനാണെന്നുള്ള തിരിച്ചറിവു ലഭിക്കാത്തിടത്തോളം 'ക്ലാവര്‍'കുരിശില്‍ നോക്കിനില്‍ക്കുകയും, കര്‍ത്താവിന്‍റെ ബലിപീഠത്തില്‍ അര്‍പ്പിക്കപ്പെടുന്ന ബലിവസ്തുക്കളില്‍ അവിടുന്നു സജ്ജീവനായി വരുന്നതു തിരിച്ചറിയാതിരിക്കുകയും ചെയ്യും! സക്രാരിയുടെ മുന്നില്‍ നില്‍ക്കുന്ന പുരോഹിതന്‍, സക്രാരിയില്‍ വസിക്കുന്നവന്‍റെ പ്രതിനിധിയാണ്! പുരോഹിതനെ മുന്നില്‍നിര്‍ത്തി ശുശ്രൂഷ ചെയ്യിപ്പിക്കുന്നത് കര്‍ത്താവായ യേശു തന്നെയാണെന്നു നാം തിരിച്ചറിയണം! മാത്രവുമല്ല, അടച്ചിട്ട സക്രാരിയുടെ മുന്നില്‍നില്‍ക്കുന്നത് അവഹേളനമാണെങ്കില്‍, ദൈവാലയത്തിനു മുന്നില്‍നില്‍ക്കുന്നതും അപ്രകാരംതന്നെയാണ്! കുറച്ചുകൂടി വിശാലമായി ചിന്തിച്ചാല്‍, നാം എവിടെ നിന്നാലും നമുക്കു പിന്നില്‍ ഒരു ദൈവാലയം ഉണ്ടായേക്കാം!

നിത്യസ്തുതിക്ക് യോഗ്യമായ പരിശുദ്ധ പരമ ദിവ്യകാരുണ്യം!

റോമന്‍ കത്തോലിക്കാസഭയില്‍ അര്‍പ്പിക്കപ്പെടുന്ന ബലിയില്‍ രൂപാന്തരപ്പെടുന്ന അപ്പത്തിലും വീഞ്ഞിലും വസിക്കുന്നത് നിത്യസ്തുതിക്കു യോഗ്യനായ യേശുവാണ്! ദിവ്യകാരുണ്യ അദ്ഭുതങ്ങള്‍ ഇതു തെളിയിക്കുന്നുണ്ട്. ലോകമാസകലം നടന്നിട്ടുള്ള ദിവ്യകാരുണ്യ അദ്ഭുതങ്ങളില്‍ ഒന്ന് വായനക്കാര്‍ക്കായി മനോവ വെളിപ്പെടുത്തുകയാണ്.

എട്ടാംനൂറ്റാണ്ടില്‍ ഇറ്റലിയിലെ ലാന്‍സിയാനോ നഗരത്തിലെ ഒരു പള്ളിയില്‍ നടന്ന അദ്ഭുതമാണ്‌ മനോവ വെളിപ്പെടുത്താന്‍ ആഗ്രഹിക്കുന്നത്. ഈ ദൈവാലയത്തില്‍ ഒരു ബസീലിയന്‍ സന്യാസി ദിവ്യബലിയര്‍പ്പിച്ചുകൊണ്ടിരിക്കവേ, ആശിര്‍വദിച്ച തിരുവോസ്തി മാംസമായും വീഞ്ഞ് രക്തമായും രൂപാന്തരപ്പെട്ടു! പരിശുദ്ധ കുര്‍ബാനയിലുള്ള ഈശോയുടെ സാന്നിദ്ധ്യത്തെപ്പറ്റി തീര്‍ത്തും സംശയാലുവായിരുന്നു ഈ വൈദികന്‍. സംശയം മൂത്ത് പൌരോഹിത്യം ഉപേക്ഷിക്കുന്നതിനെപ്പറ്റി അദ്ദേഹം ഗൌരവമായി ചിന്തിക്കുന്ന കാലമായിരുന്നു ഈ സംഭവം. കൂദാശാവചനങ്ങള്‍ ഉച്ചരിച്ചുകഴിഞ്ഞപ്പോള്‍ കണ്ട കാഴ്ച വൈദികനെ പരിഭ്രാന്തനാക്കി. തിരുവോസ്തി മാംസമായും വീഞ്ഞ് രക്തമായും രൂപാന്തരപ്പെട്ടിരിക്കുന്നു! ഇതാണ് ലോകത്തില്‍ ആദ്യമായി നടന്ന ദിവ്യകാരുണ്യ അദ്ഭുതം. ലോകത്തിന്‍റെ പല ഭാഗങ്ങളിലായി ഇന്നും ആവര്‍ത്തിക്കപ്പെടുന്ന ദിവ്യകാരുണ്യ മഹാത്ഭുതങ്ങള്‍ക്കു തുടക്കം കുറിക്കുകയായിരുന്നു അവിടെ. 1300 വര്‍ഷം പിന്നിട്ടിട്ടും ഇന്നും കേടുകൂടാതെ നിലനില്‍ക്കുന്ന ഈ മാംസരക്തങ്ങള്‍ ശാസ്ത്രലോകത്തിനും അദ്ഭുതമാണ്‌! സ്വാഭാവികാവസ്ഥയില്‍ സൂക്ഷിക്കുകയും പ്രകൃത്യാന്തരീക്ഷ ജൈവശക്തികള്‍ക്ക് വിധേയമാക്കിയിരിക്കുകയും ചെയ്തിട്ടും യാതൊരു മാറ്റവുമില്ലാതെ ഇന്നും ആ മാംസവും രക്തവും നിലകൊള്ളുന്നു.

ഈ അത്ഭുതത്തിന്റെ ആധികാരികത പല തവണ അന്വേഷണവിധേയമാക്കപ്പെട്ടു. പ്രസിദ്ധ ശാസ്ത്രജ്ഞനായ പ്രൊഫസ്സര്‍ ഒഡോര്‍ഡോ ലിനോളിയും അദ്ദേഹത്തിന്‍റെ സഹായി പ്രൊഫസ്സര്‍ റുഗറോ ബര്‍ട്ടീലിയും ചേര്‍ന്നു നടത്തിയ ശാസ്ത്രീയ ഗവേഷണങ്ങള്‍ക്കും ഈ മഹാത്ഭുതത്തെ സ്ഥിരീകരിക്കാന്‍ മാത്രമേ കഴിഞ്ഞിട്ടുള്ളൂ.

ഗവേഷണ ഫലങ്ങള്‍ ഇവയായിരുന്നു: മാംസം യഥാര്‍ത്ഥ മാംസവും രക്തം യഥാര്‍ത്ഥ രക്തവുമാണ്. മാംസവും രക്തവും മനുഷ്യന്‍റെതു തന്നെ. മാംസം ഹൃദയ പേശികളുടെയും (Muscular tissue of the Heart). ഒരു പൂര്‍ണ ഹൃദയത്തിന്‍റെ മുഴുവന്‍ ഘടകങ്ങളും ഉള്‍പ്പെട്ടതാണ് മാംസഭാഗം. രക്തഗ്രൂപ്പ് AB +ve ആണ്. രക്തത്തില്‍ ക്ലോറൈഡ്, ഫോസ്ഫറസ്, മഗ്നീഷ്യം, പൊട്ടാസ്യം, സോഡിയം, കാത്സ്യം എന്നീ ധാതുക്കളും ഉണ്ട്.

1978-ല്‍ നാസായിലെ ഒരുകൂട്ടം ശാസ്ത്രജ്ഞന്മാര്‍ ടുറിനില്‍(ജര്‍മ്മനി) സൂക്ഷിച്ചിരിക്കുന്ന തിരുക്കച്ച(The Holy Shroud of Turin) പരീക്ഷണവിധേയമാക്കുകയുണ്ടായി. തിരുക്കച്ചയുടെ ആധികാരികത തെളിയിക്കുന്ന പല കണ്ടുപിടിത്തങ്ങള്‍ക്കുമൊപ്പം മറ്റൊരു സുപ്രധാന കണ്ടുപിടിത്തവും അവര്‍ നടത്തി. അതായത്, തിരുക്കച്ചയില്‍ കാണപ്പെട്ട രക്തത്തിന്‍റെ ഗ്രൂപ്പ്‌ AB + ve ആണ്! ലാന്‍സിയാനോവിലെ അത്ഭുതത്തില്‍ കാണപ്പെട്ട രക്തത്തിന്‍റെ അതേ ഗ്രൂപ്പ് തന്നെ!

ഇന്നും അനേകം സ്ഥലങ്ങളില്‍ ഇത്തരത്തില്‍ ആവര്‍ത്തിക്കുന്നത് നമ്മുടെ വിശ്വാസം വര്‍ദ്ധിപ്പിച്ചു നല്‍കുവാനും റോമന്‍ കത്തോലിക്കാസഭയുടെ ദിവ്യബലിയില്‍ കര്‍ത്താവിനുള്ള സ്വീകാര്യത വെളിപ്പെടുത്തുവാനുമാണ്. കണ്മുന്നില്‍ തെളിഞ്ഞുനില്‍ക്കുന്ന യാഥാര്‍ത്ഥ്യങ്ങള്‍ വിശ്വസിക്കാന്‍ കഴിയാത്തവിധം ഹൃദയം ഘനീഭവിച്ചുപോയ ഒരു തലമുറയാണ് കത്തോലിക്കാസഭയില്‍പ്പോലും ഇന്നുള്ളത് എന്നകാര്യം വേദനാകരമാകുന്നു. ലത്തീന്‍ സഭയുടെ ഉറച്ച വിശ്വാസത്തെ വിലമതിച്ചുകൊണ്ട്, ആ ആരാധനാക്രമത്തിലുള്ള ദിവ്യബലിയില്‍ മാത്രം അദ്ഭുതങ്ങള്‍ പ്രവര്‍ത്തിക്കാന്‍ കര്‍ത്താവു തയ്യാറാവുമ്പോള്‍, മറ്റു സഭകള്‍ ഓര്‍ക്കുക: 'ഉചിതമായി പ്രവര്‍ത്തിച്ചാല്‍ നിങ്ങളും സ്വീകാര്യരാകും'! ദിവ്യസക്രാരിയെ അവഗണിച്ചുകൊണ്ട് പാഷാണ്ഡതകളെ പ്രഥമസ്ഥാനത്തു പ്രതിഷ്ഠിക്കാന്‍ തയ്യാറെടുക്കുന്നവര്‍ വചനവിരോധികളാണെന്ന കാര്യത്തില്‍ മനോവയ്ക്കു യാതൊരു സംശയവുമില്ല! റോമന്‍ കത്തോലിക്കാസഭയുടെ ഭാഗമാണെന്നു പറയുമ്പോഴും, ദിവ്യകാരുണ്യ ആരാധനയ്ക്കു പ്രാമുഖ്യം നല്‍കാന്‍ മടിക്കുന്നവരെ വിശ്വാസികള്‍ തിരിച്ചറിയണം. പൗരസ്ത്യവാദികളുടെ അബദ്ധസിദ്ധാന്തത്തില്‍, ദിവ്യകാരുണ്യത്തിലെ യേശുവിന്‍റെ സാന്നിദ്ധ്യം ഏതാനും നിമിഷങ്ങള്‍ മാത്രമുള്ളതാണ്! 1300 വര്‍ഷത്തിലേറെയായി യാതൊരു മാറ്റവുമില്ലാതെ തുടരുന്ന യേശുവിന്‍റെ സാന്നിദ്ധ്യം കാണാന്‍ ഇവരിലെ പൈശാചികത ഇവരെ അനുവദിക്കുന്നില്ല! യേശുവിന്‍റെ ശരീരരക്തങ്ങളെ അവമതിക്കാനുള്ള പ്രേരണ ഇവര്‍ക്കു നല്‍കുന്നത് ഈസാനബിയുടെ ആത്മാവാണെന്നു വ്യക്തം!

ഇറ്റലിയിലെ ലാന്‍സിയാനോയിലേക്ക് ഓരോ വര്‍ഷവും ദശലക്ഷങ്ങളാണു തീര്‍ഥാടകരായി കടന്നുവരുന്നത്. ആത്മീയ തീര്‍ഥാടനങ്ങള്‍ വളരെ നല്ലതുതന്നെ! എന്നാല്‍, ഇതേ ശരീരരക്തങ്ങള്‍ തന്നെയാണു നമ്മുടെ ഇടവകപ്പള്ളിയിലെ സക്രാരിയിലുള്ളതുമെന്ന സത്യം പലപ്പോഴും നാം മറക്കുന്നു! ലാന്‍സിയാനോയിലെ അരളിക്കയില്‍ നോക്കി ആത്മനിര്‍വൃതി അടയുന്നവര്‍, സ്വന്തം പള്ളിയില്‍ ഈ ദിവ്യകാരുണ്യത്തെ അവഗണിക്കുന്നതും വിലമതിക്കാത്തതും വേദനയോടെ തിരുത്തണം!

ദിവ്യകാരുണ്യത്തെക്കുറിച്ച് അബദ്ധധാരണയില്‍ കഴിയുന്ന ഓര്‍ത്തഡോക്സ് സഭയെ, അവര്‍ ആയിരിക്കുന്ന വിശ്വാസത്തോടെ കത്തോലിക്കാസഭയില്‍ ചേര്‍ക്കാനുള്ള ക്ളിമ്മീസിന്‍റെ പരിശ്രമത്തെയും ഗൗരവത്തോടെ കാണേണ്ടിയിരിക്കുന്നു! തന്‍റെ മന്ത്രവാദങ്ങള്‍ക്കും ആഭിചാരക്രിയകള്‍ക്കും അന്യദേവ പ്രീണനങ്ങള്‍ക്കും പിന്തുണ വര്‍ദ്ധിപ്പിക്കാനുള്ള തീവ്രയജ്ഞത്തിലാണ് ഇയാള്‍! കത്തോലിക്കാസഭയെ അമൃതാനന്തമയിയുടെ കാല്‍ക്കീഴില്‍ അടിയറവയ്ക്കാനുള്ള ക്ളിമ്മീസിന്‍റെ പൈശാചിക നീക്കങ്ങളെയും വിശ്വാസികള്‍ ചെറുത്തുതോല്പിക്കണം!

എക്യുമെനിസമെന്ന കെണി!

ഒരിടയനും ഒരു തൊഴുത്തും എന്ന ഏകീകരിച്ച വിശ്വാസത്തിലേക്കും ആചാരത്തിലേക്കും ദൈവജനം എത്തിച്ചേരണമെന്നത് യേശുവിന്‍റെ ആഗ്രഹമാണെന്നു നമുക്കറിയാം. മനോവയും ഇതുതന്നെ ആഗ്രഹിക്കുന്നു! കര്‍ത്താവിനെ സ്നേഹിക്കുന്നവര്‍ തങ്ങളുടെ ഇഷ്ടങ്ങളെക്കാള്‍ അവിടുത്തെ ഇഷ്ടത്തിനു പ്രാധാന്യം കൊടുക്കും. എന്നാല്‍, ഒരിടയനും ഒരു തൊഴുത്തുമെന്ന ആശയം നടപ്പാക്കുന്നതിനായി വിശ്വാസസത്യങ്ങളെ ബലികഴിക്കുന്ന അവസ്ഥ ശരിയല്ല. എക്യുമെനിസത്തില്‍ ഇത്തരത്തിലുള്ള ചില ദുരന്തങ്ങള്‍ ഒളിഞ്ഞിരിക്കുന്നു എന്നതാണ് വസ്തുത. കത്തോലിക്കാസഭയില്‍ കടന്നുകൂടിയ പൗരസ്ത്യസഭകള്‍ ഉയര്‍ത്തുന്ന വെല്ലുവിളികള്‍ ഇത്തരത്തിലുണ്ടായ ദുരന്തമാണ്. കത്തോലിക്കാസഭയുടെ വിശ്വാസസത്യങ്ങളെ അംഗീകരിച്ചുകൊണ്ടാണ് കടന്നുവന്നതെങ്കിലും ചില പാരമ്പര്യങ്ങള്‍ തുടരാന്‍ അവസരം നല്‍കിയത് വലിയ അപകടമായി! പാരമ്പര്യങ്ങളുടെ പേരില്‍ എല്ലാവിധ പാഷാണ്ഡതകളും സഭയിലേക്കു കടത്തിക്കൊണ്ടുവരാന്‍ ഈ സ്വാതന്ത്ര്യം കാരണമായി. മാത്രവുമല്ല, ഒളിഞ്ഞുംതെളിഞ്ഞും കത്തോലിക്കാസഭയുടെ പാവനമായ വിശ്വാസങ്ങളെ അവമതിക്കുന്ന രീതിയും ഇവര്‍ സ്വീകരിക്കുന്നു! മാതാവിന്‍റെ അമലോത്ഭവ വിശ്വാസത്തെയും ജപമാലയെയും പരസ്യമായി അവഹേളിക്കാന്‍ കല്‍ദായവാദികള്‍ തയ്യാറാകുന്നത് വത്തിക്കാന്‍ അറിയുന്നില്ല! കത്തോലിക്കാസഭയുടെ അണ്ണാക്കില്‍ ബാധിച്ച വൃണംപോലെയാണ് കല്‍ദായവാദികള്‍!

വിജാതിയത ഒരു അലങ്കാരമായി തലയില്‍ ചൂടുന്ന ക്ളിമ്മീസിന്‍റെ നേതൃത്വത്തില്‍ നടക്കുന്ന ഓര്‍ത്തഡോക്സ് ലയന ശ്രമം 'എക്യുമെനിസത്തിന്‍റെ പുതിയ ദുരന്തമാകും എന്നകാര്യത്തില്‍ സംശയമില്ല! കാരണം, ക്ളിമ്മീസിന്‍റെ ആശയങ്ങളെ പൂര്‍ണ്ണമായും പിന്തുണയ്ക്കുന്ന വിജാതിയവാദികളുടെ സംഘമാണ് ഇന്നത്തെ ഓര്‍ത്തഡോക്സ് സഭ! ഓര്‍ത്തഡോക്സ് സഭയുടെ വിശ്വാസങ്ങളെയും ആചാരങ്ങളെയും വിമര്‍ശിക്കാനോ വിചാരണ ചെയ്യാനോ അല്ല മനോവ ശ്രമിക്കുന്നത്. എന്നാല്‍, കത്തോലിക്കാസഭയുടെ വിശ്വാസങ്ങളും ആചാരങ്ങളുമായി ഇവരുടെ ആചാരങ്ങള്‍ക്കും വിശ്വാസങ്ങള്‍ക്കും ഏറെ അന്തരമുണ്ടായിരിക്കെ, ഇവരുമായുള്ള ലയനത്തിലൂടെ ഉണ്ടാകാവുന്ന ദുരന്തങ്ങളെ ചൂണ്ടിക്കാട്ടേണ്ടത് മനോവയുടെ ധര്‍മ്മമാകുന്നു. മലങ്കരസുറിയാനി സഭയുടെ പുനരൈക്യം വഴി സംഭവിച്ചത് ഒരു പാഠമായി നമുക്കു മുന്നിലുണ്ട്. എണ്ണയും വെള്ളവും പോലുള്ള കൂടിച്ചേരലിനേക്കാള്‍ നല്ലത് വേറിട്ടുനില്‍ക്കുന്നതു തന്നെയാണെന്ന യാഥാര്‍ത്ഥ്യം നാം ഉള്‍ക്കൊള്ളണം! വ്യത്യസ്ഥ ആചാരങ്ങളില്‍ തുടര്‍ന്നുകൊണ്ടുള്ള ഒന്നാകല്‍ വെറും പ്രഹസനം മാത്രമാണെന്നു പ്രത്യേകം പറയേണ്ടതില്ലല്ലോ!

ദിവ്യകാരുണ്യത്തില്‍ വസിക്കുന്ന യേശുവിനെ സാത്താന്‍ തിരിച്ചറിഞ്ഞു!

ദിവ്യകാരുണ്യത്തില്‍ നിത്യമായി യേശു വസിക്കുന്നുവെന്ന സത്യം കത്തോലിക്കാസഭയിലെ ചില റീത്തുകള്‍ തിരിച്ചറിഞ്ഞിട്ടില്ല! മറ്റു ക്രൈസ്തവസഭകള്‍ തിരിച്ചറിയാത്തതിനേക്കാള്‍ ഗൗരവകരമായ വിപത്താണ് ഇവരുടെ അജ്ഞത! തങ്ങള്‍ പരിശുദ്ധാത്മാവിനാല്‍ നയിക്കപ്പെടുന്നവരാണെന്നു മേനിപറയുന്ന ക്രൈസ്തവര്‍ക്കു തിരിച്ചറിയാന്‍ കഴിഞ്ഞില്ലെങ്കിലും, ദിവ്യകാരുണ്യത്തില്‍ സജ്ജീവനായി വസിക്കുന്ന യേശുവിനെ പിശാചിനു നന്നായി അറിയാം! അതുകൊണ്ടാണ്, കത്തോലിക്കാസഭയില്‍ ആശിര്‍വദിക്കപ്പെടുന്ന തിരുവോസ്തി തട്ടിയെടുക്കുകയും, ആ ദിവ്യകാരുണ്യത്തെ അപമാനിച്ചുകൊണ്ട് സാത്താനെ പ്രീതിപ്പെടുത്തുകയും ചെയ്യാന്‍ സാത്താന്‍സേവ(ബ്ലാക്ക് മാസ്) നടത്തുന്നവര്‍  തയ്യാറാകുന്നത്! ഭൂമുഖത്തുള്ള മറ്റു ക്രൈസ്തവസഭകളില്‍ ചിലതും 'കുര്‍ബാന' അര്‍പ്പിക്കുന്നവരാണെന്നു നമുക്കറിയാം! അപ്പം മുറിക്കല്‍ എന്നപേരില്‍ കുടുംബസഭകളും ആചാരങ്ങള്‍ നടത്താറുണ്ട്. എന്നാല്‍, ഇവിടെയൊന്നും ദിവ്യകാരുണ്യ അദ്ഭുതങ്ങള്‍ നടക്കാറില്ലെന്നു മാത്രമല്ല, അവരുടെ അപ്പങ്ങള്‍ സാത്താന്‍സേവക്കാര്‍ ഗൗനിക്കാറുമില്ല!

ബൈബിളിലെ ഒരു സംഭവം ഇവിടെ പ്രത്യേകമായി ഓര്‍ക്കേണ്ടതുണ്ട്. ഇസ്രായേല്‍ജനം പ്രത്യാശയോടെ കാത്തിരുന്നത് മിശിഹായുടെ വരവിനെയായിരുന്നുവെന്നു നമുക്കറിവുള്ളതാണല്ലോ! എന്നാല്‍, അവിടുന്നു വരികയും അടയാളങ്ങളിലൂടെ തന്നെത്തന്നെ വെളിപ്പെടുത്തുകയും ചെയ്തിട്ടും യഹൂദരിലെ വിജ്ഞാനികള്‍ അവിടുത്തെ തിരിച്ചറിഞ്ഞില്ല! നിയമങ്ങളിലും പ്രവചനങ്ങളിലും ആഴമായ അറിവുണ്ടെന്നു ഭാവിച്ചിരുന്ന ഫരിസേയര്‍ക്കും പുരോഹിതപ്രമാണിമാര്‍ക്കും തിരിച്ചറിയാന്‍ കഴിയാത്ത ദൈവപുത്രനെ, സാത്താന്‍ തിരിച്ചറിയുന്ന സംഭവം ബൈബിളില്‍ വായിക്കുന്നുണ്ട്! പിശാചുബാധിതരും ദുരാത്മാക്കളല്‍ ബന്ധിക്കപ്പെട്ടു കഴിഞ്ഞിരുന്നവരും അവര്‍ തിരിച്ചറിഞ്ഞ സത്യം വിളിച്ചുപറഞ്ഞു. ഒരു സംഭവം നോക്കുക: "യേശു മറുകരെ, ഗദറായരുടെ ദേശത്തെത്തിയപ്പോള്‍ ശവക്കല്ലറകളില്‍നിന്ന്‍ ഇറങ്ങിവന്ന രണ്ടു പിശാചുബാധിതര്‍ അവനെ കണ്ടുമുട്ടി. ആര്‍ക്കും ആ വഴി സഞ്ചരിക്കാന്‍ സാധിക്കാത്തവിധം അവര്‍ അപകടകാരികളായിരുന്നു. അവര്‍ അട്ടഹസിച്ചു പറഞ്ഞു: ദൈവപുത്രാ, നീ എന്തിന് ഞങ്ങളുടെ കാര്യത്തില്‍ ഇടപെടുന്നു? സമയത്തിനുമുമ്പ് ഞങ്ങളെ പീഡിപ്പിക്കാന്‍ നീ ഇവിടെ വന്നിരിക്കുകയാണോ?"(മത്താ:8;28,29). സമയത്തിനുമുമ്പ് എന്ന ഇവരുടെ ചോദ്യത്തിനു കാരണമുണ്ട്. കാരണം, പിശാചുക്കളെ എന്നേക്കുമായി നരകത്തിലടയ്ക്കുവാനുള്ള സമയം അപ്പോള്‍ ആയിരുന്നില്ല; കര്‍ത്താവിന്‍റെ രണ്ടാമത്തെ ആഗമനത്തിലാണ് അപ്രകാരം ചെയ്യുന്നത്! ഈ കാരണത്താലാണ്, അവര്‍ ഇപ്രകാരം കര്‍ത്താവിനോടു ചോദിച്ചത്. നമ്മുടെ വിഷയം മറ്റൊന്നായിരിക്കുന്നതിനാല്‍, ഈ വിഷയത്തിലേക്കു കടക്കാന്‍ മുതിരുന്നില്ല!

അന്നത്തെ യഹൂദപ്രമാണിമാരെപ്പോലെതന്നെ ഇന്നത്തെ 'വിജ്ഞാനികളും കര്‍ത്താവിനെ തിരിച്ചറിയാത്ത അവസ്ഥയുണ്ട്. അതുകൊണ്ടാണ്, ഇക്കൂട്ടര്‍ പുതിയ പരീക്ഷണങ്ങളും മറ്റുമായി വിജാതിയര്‍ക്കു പിന്നാലെ കറങ്ങുന്നതും അവരുടെ സിനഗോഗുകളിലെ നിത്യസന്ദര്‍ശകരായി അധഃപതിക്കുന്നതും! അന്നത്തെ പൗരോഹിത്യസമൂഹം മിശിഹാ വന്നത് തിരിച്ചറിഞ്ഞില്ലെങ്കില്‍, ഇന്നത്തെ പൗരോഹിത്യവിഭാഗത്തില്‍ പലരും അവിടുന്നു കൂടെ വസിക്കുന്നത് തിരിച്ചറിയുന്നില്ല! എന്നാല്‍, ദിവ്യകാരുണ്യ നാഥനായി നമ്മോടുകൂടെ നിത്യം വസിക്കുന്ന യേശുവിനെ തിരിച്ചറിയാന്‍ സാത്താന്‍റെ സന്തതികള്‍ക്കു സാധിക്കുന്നു! ഇക്കാരണത്താലാണു സാത്താന്‍സേവക്കാര്‍ കത്തോലിക്കാ പള്ളികളില്‍നിന്നു തിരുവോസ്തി മോഷ്ടിക്കാന്‍ തയ്യാറാവുന്നത്. തട്ടിയെടുക്കുന്ന തിരുവോസ്തിയെ അപമാനിക്കുന്ന സംഘങ്ങള്‍ ലോകം മുഴുവനിലും വ്യാപിച്ചുകഴിഞ്ഞു! പോപ്പ് ജോണ്‍പോളിന്‍റെ കാലത്തുണ്ടാക്കിയ ചില തുഗ്ലക്ക് പരിഷ്കാരങ്ങളായിരുന്നു ഇവരുടെ പ്രവര്‍ത്തനങ്ങളെ സുഗമമാക്കിയത്!

ദിവ്യകാരുണ്യത്തോടുള്ള ഭക്തിയും വിഭക്തിയും!

ദിവ്യകാരുണ്യ ആരാധനയും പരസ്യവണക്കവും കത്തോലിക്കാസഭയുടെ വിശ്വാസസത്യങ്ങളില്‍ പരമപ്രധാനമാണെങ്കിലും, കുറേക്കാലങ്ങളായി ചില ദുഃസൂചനകള്‍ കണ്ടുവരുന്നത് പലരും ഗൗരവമായി കാണുന്നില്ല! ദിവ്യകാരുണ്യ അദ്ഭുതങ്ങളിലൂടെ അനേകം അടയാളങ്ങള്‍ കര്‍ത്താവ് നല്‍കിക്കൊണ്ടിരിക്കുന്ന ഈ കാലഘട്ടത്തില്‍ത്തന്നെ, സാത്താനും അവന്‍റെ പ്രവര്‍ത്തനങ്ങള്‍ സജ്ജീവമാക്കിക്കൊണ്ടിരിക്കുന്നു. സഭയുടെ ഉന്നത ശ്രേണികളില്‍ അവന്‍ തന്‍റെ അനുയായികളെ തന്ത്രപൂര്‍വ്വം പ്രതിഷ്ഠിച്ചുകൊണ്ടുള്ള നീക്കമാണ് ഇതില്‍ ഏറ്റവും ഗുരുതരമായിട്ടുള്ളത്! ഇത്തരത്തില്‍ ഇവന്‍റെ ആജ്ഞാനുവര്‍ത്തികളായി നിലകൊള്ളുന്ന വ്യക്തികളുടെ ഗൂഢസംഘമാണ് 'ഫ്രീമേസണ്‍' പ്രസ്ഥാനം! ദിവ്യകാരുണ്യത്തോടുള്ള ഭക്തിയില്‍നിന്നു ദൈവജനത്തെ പടിപടിയായി അകറ്റുകയും അനാദരിക്കാനുള്ള പ്രേരണ നല്‍കുകയുമാണ് ഇവരുടെ പ്രവര്‍ത്തനരീതി. ആര്‍ക്കും വേഗത്തില്‍ തിരിച്ചറിയാന്‍ സാധിക്കാത്തവിധം കൌശലപൂര്‍വ്വമാണ് ഇവരുടെ നീക്കങ്ങള്‍! കത്തോലിക്കാസഭയുടെ സെമിനാരികള്‍, ധ്യാനകേന്ദ്രങ്ങള്‍, ഭക്തസംഘടനകള്‍, സ്കൂളുകള്‍, മതബോധനകേന്ദ്രങ്ങള്‍ തുടങ്ങിയവയിലെല്ലാം ഫ്രീമേസണ്‍ സംഘം ആധിപത്യം ഉറപ്പിച്ചുകഴിഞ്ഞു. തിരുനാളുകളിലും മറ്റ് ആഘോഷങ്ങളിലും മാത്രമല്ല, കൂദാശാ പരികര്‍മ്മങ്ങളില്‍പ്പോലും ഈ ഗൂഢസംഘത്തിന്‍റെ വ്യക്തമായ സ്വാധീനം കാണാന്‍ കഴിയും!

വത്തിക്കാനില്‍നിന്നുള്ള തീരുമാനങ്ങളാണെന്ന വാദത്തോടെ സാധാരണ വിശ്വാസികള്‍ക്കു മനസ്സിലാക്കാന്‍ പ്രയാസമുള്ള ദൈവശാസ്ത്രങ്ങള്‍ ഇവരുടെമേല്‍ അടിച്ചേല്പിക്കുന്ന പ്രവണതയെ തിരിച്ചറിഞ്ഞില്ലെങ്കില്‍ ദുരന്തം അകലെയല്ല! വചനവിരുദ്ധമായ ആചാരങ്ങളുമായി ചുറ്റിത്തിരിയുന്നവരെല്ലാം, തങ്ങളുടെ വാദങ്ങളെ സാധൂകരിക്കാന്‍ ഉയര്‍ത്തിപ്പിടിക്കുന്നത് 'രണ്ടാംവത്തിക്കാന്‍ സൂനഹദോസ്' ആണെന്നതും ശ്രദ്ധേയമാണ്!  ഈ സൂനഹദോസില്‍ ഉള്ളതും ഇല്ലാത്തതുമായ കാര്യങ്ങള്‍ ഉയര്‍ത്തിപ്പിടിക്കുന്നതോടൊപ്പം ദുര്‍വ്യാഖ്യാനങ്ങള്‍ നല്‍കി തങ്ങളുടെ ആശയങ്ങളോടു സമരസപ്പെടുത്താനും ഇവറ്റകള്‍ തയ്യാറാകുന്നു! അവ്യക്തതയോടെയുള്ള പ്രഖ്യാപനങ്ങളില്‍ പലതും 'ഫ്രീമേസണ്‍'സംഘങ്ങള്‍ക്കു തങ്ങളുടെ ഇംഗിതത്തിനനുസരണം വളച്ചൊടിക്കാന്‍ പര്യാപ്തമായി എന്നതും ശ്രദ്ധേയമാണ്. വിജാതിയ ആലയങ്ങളിലും ആള്‍ദേവതകളുടെ അന്തപ്പുരങ്ങളിലും നിരങ്ങിനടക്കുന്ന സാത്താന്‍റെ അഭിഷിക്തരും രണ്ടാംവത്തിക്കാന്‍ സൂനഹദോസിന്‍റെ ഉത്പന്നങ്ങളാണ്!

ദിവ്യകാരുണ്യത്തിനു നല്‍കിയിരുന്ന ആദരവില്‍ മായം കലര്‍ന്നത് എപ്പോള്‍ മുതലായിരുന്നുവെന്നു ചിന്തിച്ചാല്‍ ചില ദുരൂഹതകളുടെ കെട്ടുകള്‍ ആഴിയും. ഒരു തലമുറ മുന്‍പുവരെ ദിവ്യകാരുണ്യത്തോടു പുലര്‍ത്തിയിരുന്ന ആദരവും ഇന്നത്തെ അവസ്ഥയും ചുരുക്കമായെങ്കിലും ഇവിടെ ചിന്തിക്കേണ്ടിയിരിക്കുന്നു. ഇന്നത്തെ തലമുറയിലെ മുതിര്‍ന്ന വ്യക്തികള്‍ക്ക് അനുഭവമുള്ളതും യുവതലമുറ കേട്ടറിഞ്ഞിട്ടുണ്ടാവാന്‍ സാധ്യതയുള്ളതുമായ ചില കാര്യങ്ങള്‍ വെളിപ്പെടുത്താം.

ആശുപത്രികളിലോ വീടുകളിലോ കിടപ്പുരോഗികളായി കഴിയുന്ന വ്യക്തികള്‍ക്കു നല്‍കുവാന്‍ കുര്‍ബാനയും വഹിച്ചുകൊണ്ട് വൈദീകര്‍ പോകാറുണ്ട്. പണ്ടുകാലത്ത് നാട്ടിന്‍പുറങ്ങളിലൊക്കെ ഇത്തരം കാഴ്ചകള്‍ പതിവായിരുന്നു. വഴിയില്‍ കണ്ടുമുട്ടുന്ന ആരോടും സംസാരിക്കാതെ കടന്നുപോകുന്ന പുരോഹിതനെ കണ്ടാല്‍, അതു ദിവ്യകാരുണ്യവും വഹിച്ചുള്ള യാത്രയാണെന്നു വിശ്വാസികള്‍ക്കു മനസ്സിലാകുമായിരുന്നു! കാരണം, ഇത്തരം വിഷയങ്ങളില്‍ വിശ്വാസികള്‍ക്കു വ്യക്തമായ അവബോധം നല്‍കാന്‍ കത്തോലിക്കാസഭ ജാഗ്രത പാലിച്ചിരുന്നു. മതബോധന ക്ലാസുകളില്‍ കുട്ടികളോടു ചോദിച്ചിരുന്ന ഒരു ചോദ്യം ഇതായിരുന്നു: 'മുക്കോണ്‍ തൊപ്പി ധരിച്ച ഒരു പുരോഹിതന്‍ കടന്നുപോകുന്നതു കണ്ടാല്‍ നിങ്ങള്‍ എന്തു ചെയ്യണം?' പരിശുദ്ധ കുര്‍ബാനയുമായി പുരോഹിതര്‍ യാത്രചെയ്യുമ്പോള്‍ ധരിക്കുന്ന തൊപ്പിയിലൂടെ വിശ്വാസികള്‍ക്ക് അടയാളം നല്‍കിയത്, അറിയാതെപോലും ദിവ്യകാരുണ്യം അനാദരിക്കപ്പെടരുതെന്ന ചിന്തയോടെയാണ്! ഒരു പുരോഹിതന്‍ മുക്കോണ്‍ തൊപ്പി ധരിച്ചു നടന്നുപോകുന്നത് എവിടെവച്ചു കണ്ടാലും മുട്ടുകുത്തി ആദരവു പ്രകടിപ്പിക്കുന്ന ശീലം കത്തോലിക്കാസഭാ വിശ്വാസികള്‍ വച്ചുപുലര്‍ത്തിയിട്ടുണ്ട്. അരനൂറ്റാണ്ടു മുന്‍പുവരെ ദിവ്യകാരുണ്യത്തോടുള്ള ആദരവ് ഇതായിരുന്നുവെങ്കില്‍, ഇന്നത്തെ അവസ്ഥ എന്താണെന്നു മനോവ വ്യക്തമാക്കാതെതന്നെ വായനക്കാര്‍ക്കു ചിന്തിക്കാന്‍ സാധിക്കും!

ഇത്രത്തോളം ആദരവു നല്‍കിയിരുന്ന ദിവ്യകാരുണ്യത്തെ അവമതിക്കാന്‍ ആരംഭിച്ചത് രണ്ടാംവത്തിക്കാന്‍ സൂനഹദോസിനുശേഷമായിരുന്നുവെന്ന് മനോവ പറയുമ്പോള്‍, അതിനെതിരെ വാളെടുക്കുന്നവര്‍ ചരിത്രത്തെ വേണ്ടവിധം ഗ്രഹിച്ചിട്ടില്ല എന്നതാണു സത്യം. രണ്ടാംവത്തിക്കാന്‍ സൂനഹദോസിനെ യേശുവിനേക്കാള്‍ അധികമായി പരിഗണിക്കുന്ന സ്ഥാപിതതാല്‍പ്പര്യക്കാര്‍ സഭയിലുള്ളതാണ് ഇതിനു കാരണം. ഈ സൂനഹദോസില്‍ ഒളിഞ്ഞിരുന്ന തിന്മയെ കൂടുതല്‍ ഒളിപ്പിക്കാനുള്ള വ്യഗ്രത ഫ്രീമേസണ്‍സംഘം പുലര്‍ത്തിയിരുന്നു! ഇത്തരക്കാരുടെ മസ്തിഷ്ക പ്രക്ഷാളനത്തിനു വിധേയരായവര്‍, ഇവരുടെ കുഴലൂത്തുകാരായി സഭയില്‍ പ്രഥമസ്ഥാനം അലങ്കരിക്കുന്നതുകൊണ്ട്, ദൈവജനത്തില്‍നിന്നു സത്യം മറച്ചുവയ്ക്കപ്പെട്ടു! രണ്ടാംവത്തിക്കാന്‍ സൂനഹദോസിനുശേഷം അമ്പതുവര്‍ഷം തികഞ്ഞ കാലഘട്ടത്തിലാണ് ഇന്നു നാം ജീവിക്കുന്നത്. ക്രിസ്തുവിനുമുന്‍പും ക്രിസ്തുവിനുശേഷവും എന്ന്‍ കാലഘട്ടത്തെ രണ്ടായി ഭാഗിക്കുന്നതുപോലെ, കത്തോലിക്കാസഭയുടെ ആദ്ധ്യാത്മികതയെ രണ്ടാംവത്തിക്കാന്‍ സൂനഹദോസിനു മുന്‍പും പിന്‍പും എന്ന്‍ വിഭജിച്ചാല്‍, മനോവ പറയുന്നതിലെ പൊരുള്‍ ഗ്രഹിക്കാന്‍ വായനക്കാര്‍ക്കു സാധിക്കും!

ആത്മാവില്ലാത്ത ആശയങ്ങളെ പ്രഥമദൃഷ്ട്യാ നന്മയെന്നു തോന്നിപ്പിക്കുന്ന വിധത്തില്‍ അവതരിപ്പിച്ചു എന്നതാണ് ഈ സൂനഹദോസിലൂടെ സാത്താന്‍ നേടിയ വിജയം! ആദ്ധ്യാത്മികമെന്ന ധ്വനി വിശ്വാസികള്‍ക്കിടയില്‍ നല്‍കിക്കൊണ്ട് അവരെ ഭക്തിരാഹിത്യത്തിലേക്കു നയിക്കുന്ന കുതന്ത്രങ്ങള്‍ സാത്താന്‍ ഇവിടെ പ്രയോഗിച്ചു. യൂറോപ്പിലെ ആദ്ധ്യാത്മിക അധഃപതനത്തിന്‍റെ നാള്‍വഴികള്‍ പരിശോധിച്ചാല്‍, രണ്ടാംവത്തിക്കാന്‍ സൂനഹദോസില്‍ ചെന്നെത്തും ആ അന്വേഷണം! ദിവ്യകാരുണ്യ ആരാധനയുടെ കാര്യത്തില്‍ ഇത് അന്വര്‍ത്ഥമാകുന്നു. വാചക കസര്‍ത്തുകൊണ്ട് ദിവ്യകാരുണ്യ ആരാധനയെ മഹത്വപ്പെടുത്തുകയും പ്രവര്‍ത്തികൊണ്ട് അവമതിക്കുകയും ചെയ്ത നിഗൂഢതന്ത്രം സൂക്ഷ്മനിരീക്ഷണത്തിലൂടെ മാത്രമേ ഗ്രഹിക്കാന്‍ കഴിയുകയുള്ളു!

ഏറ്റവും വലിയ ദിവ്യകാരുണ്യ ഭക്തനായി പരിഗണിക്കപ്പെട്ട വ്യക്തിയായിരുന്നു ജോണ്‍പോള്‍ രണ്ടാമന്‍! എന്നാല്‍, ദിവ്യകാരുണ്യത്തെ ഏറ്റവുമധികം അവമാനിച്ച വ്യക്തിയായിരുന്നു ഇദ്ദേഹമെന്നു തെളിവുകള്‍ നിരത്തി പ്രഖ്യാപിക്കാന്‍ മനോവ തയ്യാറാണ്! ദൈവജനം മനസ്സിലാക്കിയിരിക്കേണ്ട ഈ സത്യം ലളിതമായെങ്കിലും അവതരിപ്പിക്കേണ്ടത് മനോവയുടെ കര്‍ത്തവ്യമായിരിക്കുന്നു.

നമ്മുടെ ഭവനത്തില്‍ അതിഥിയായി വന്നിരിക്കുന്ന വ്യക്തിയെ മഹാനായി മറ്റുള്ളവര്‍ക്കു പരിചയപ്പെടുത്തുന്നത് വാക്കുകള്‍കൊണ്ടുള്ള ബഹുമാനിക്കലാണ്! ആതിഥേയമര്യാദയുടെ ഭാഗമായി ഇതു ശ്ലാഘനീയവുമാകുന്നു. എന്നാല്‍, ഭക്ഷണത്തിന് ഇരിക്കുമ്പോള്‍, ഇദ്ദേഹത്തിനു 'പട്ടിപ്പാത്രത്തില്‍' ചോറ് വിളമ്പുകയും ചായ്പ്പില്‍ ചാക്കുവിരിച്ചു കിടക്കയൊരുക്കുകയും ചെയ്‌താല്‍ അതു ബഹുമാനമായി കണക്കാക്കാന്‍ കഴിയുമോ? ഇതുതന്നെയായിരുന്നു ജോണ്‍പോളിന്‍റെ ദിവ്യകാരുണ്യ ഭക്തി! പരിശുദ്ധ കുര്‍ബാനയെ വാക്കുകൊണ്ട് ബഹുമാനിക്കുകയും പ്രവര്‍ത്തികൊണ്ട് നിന്ദിക്കുകയും ചെയ്തത് തിരിച്ചറിയാന്‍ ദൈവജനത്തിനു കഴിയാതെപോയത് ദുരൂഹമാണ്! മുന്‍കാലങ്ങളില്‍ ദിവ്യകാരുണ്യത്തിനു നല്‍കിയ ആദരവുകള്‍ പടിപടിയായി എടുത്തുമാറ്റിയത് ആരായിരുന്നുവെന്ന് നാം ചിന്തിച്ചിട്ടുണ്ടോ?!

പണ്ടൊക്കെ പുരോഹിതന്‍ വിശ്വാസികള്‍ക്കു പരിശുദ്ധ കുര്‍ബാന നല്‍കുമ്പോള്‍ ഒരു പൊടിപോലും തറയില്‍ വീഴാതിരിക്കാന്‍ താലവുമായി ശുശ്രൂഷി നില്‍ക്കുമായിരുന്നു. തിരുവോസ്തിയില്‍നിന്ന്‍ അടര്‍ന്നുവീഴുന്ന ചെറിയ പൊടിപോലും പുരോഹിതന്‍ തുടച്ചെടുത്ത് കാസയിലെ വീഞ്ഞിനോടൊപ്പം ചേര്‍ത്തു കുടിക്കും. തിരുവോസ്തിയെ സ്പര്‍ശിച്ച വിരലുകള്‍ കഴുകിയ വെള്ളവും പുരോഹിതന്‍ കുടിക്കുകയായിരുന്നു പതിവ്! ഏതെങ്കിലും കാരണവശാല്‍ ഒരു തിരുവോസ്തി തറയില്‍ വീണാല്‍, ആദരവോടെ മുട്ടുകുത്തി എടുക്കുകയും അവിടെയൊരു വെള്ളത്തുവാല വിരിച്ച്, അതിനുമേലെ കൈമണി(അള്‍ത്താരയില്‍ ഉപയോഗിക്കുന്നത്)വയ്ക്കുകയും ചെയ്യും! കുര്‍ബാനയ്ക്കുശേഷം ആ ഭാഗം തുടച്ചു വൃത്തിയാക്കുന്നതുവരെ ആരും അവിടെ ചവിട്ടാതിരിക്കാന്‍ മുന്നറിയിപ്പായിട്ടാണ് ഇപ്രകാരം ചെയ്തിരുന്നത്! ഇന്നത്തെ സ്ഥിതി എന്താണെന്നു മനോവ വിവരിക്കാതെതന്നെ വായനക്കാര്‍ക്കറിയാം! ഏതു വ്യഭിചാരിക്കും സ്വവര്‍ഗ്ഗഭോഗിക്കും തിരുവോസ്തി കൈകാര്യം ചെയ്യുവാന്‍ സാഹചര്യമൊരുക്കിയത് ജോണ്‍പോള്‍ എന്ന ദിവ്യകാരുണ്യ 'ഭക്തന്‍' ആണ്! ദിവ്യകാരുണ്യം കൈകളില്‍ നല്‍കുന്ന പരിഷ്കാരവും ഇദ്ദേഹത്തിന്‍റെ വകയായിരുന്നു. സാത്താന്‍സേവക്കാരുടെ കൈകളില്‍ എത്താനുള്ള സൗകര്യം ഇതുവഴി ജോണ്‍പോള്‍ സൃഷ്ടിച്ചു!

ദിവ്യകാരുണ്യ ഭക്തനായി നടിക്കുകയും ഏറ്റവും പരിശുദ്ധമായ യേശുവിന്‍റെ ശരീരത്തെ നിന്ദിക്കുകയും ചെയ്ത ആദ്യത്തെ പോപ്പ് ജോണ്‍പോള്‍ രണ്ടാമനായിരുന്നു എന്നകാര്യത്തില്‍ ആരും സംശയിക്കേണ്ടാ! പുരോഹിതര്‍ ആദരവോടെ മാത്രം സ്പര്‍ശിച്ചിരുന്ന അരളിക്കയിലെ ദിവ്യകാരുണ്യം, ചന്തയില്‍നിന്നു പലവ്യഞ്ജനങ്ങള്‍ വാങ്ങി വരുന്ന ലാഘവത്തോടെ 'കന്യാസ്ത്രീകള്‍' കൈകാര്യം ചെയ്യുന്നത് യൂറോപ്പിലെ പള്ളികളില്‍ കാണാം! അമ്പതുവര്‍ഷം മുന്‍പുണ്ടായിരുന്ന അതേ കര്‍ത്താവു തന്നെയല്ലേ ഇന്നും ദിവ്യകാരുണ്യത്തില്‍ വസിക്കുന്നത്? ആയിരത്തിമുന്നൂറു വര്‍ഷങ്ങള്‍ക്കുമുന്‍പ് ഇറ്റലിയിലെ ലാന്‍സിയാനോയില്‍ കര്‍ത്താവു നല്‍കിയ അടയാളം ഇന്നും മാറ്റമില്ലാതെ നിലനില്‍ക്കുന്നില്ലേ? 

ദിവ്യകാരുണ്യ ആരാധനയെ എതിര്‍ക്കുന്ന കല്‍ദായവാദികള്‍ക്കു രണ്ടാംവത്തിക്കാന്‍ സൂനഹദോസ് പ്രിയങ്കരമായിത്തീര്‍ന്നതും അതിന്‍റെ പിന്നില്‍ പ്രവര്‍ത്തിച്ചവര്‍ പ്രിയങ്കരരായി മാറിയതും വെറുതെയല്ല! ഈ സൂനഹദോസ് സാത്താനുവേണ്ടി അവന്‍റെ പ്രവാചകന്‍ നടത്തിയതാണെന്നു തിരിച്ചറിയാത്തവര്‍ ഈ ലേഖനം വായിക്കുക: 'ക്രിസ്തുവിനെ തോല്‍പ്പിക്കാന്‍ ക്രിസ്ത്യാനികളുടെ സൂനഹദോസ്!' ദൈവീകനിയമങ്ങളെയും അവിടുന്നു നല്‍കുന്ന അടയാളങ്ങളെയും അവഗണിക്കാന്‍ പഠിപ്പിക്കുന്നവര്‍ എത്ര ഉന്നതരായിരുന്നാലും അംഗീകരിക്കപ്പെടാന്‍ പാടില്ല! കപട വിനയത്തോടെ ദൈവജനത്തെ വഞ്ചിക്കുന്ന അരാജകത്വത്തിന്‍റെ മനുഷ്യന്‍ കത്തോലിക്കാസഭയുടെ പരമോന്നത സ്ഥാനത്ത് ഇടംപിടിച്ചുവോ എന്നത് ജാഗ്രതയോടെ നോക്കിക്കാണണം! ഈ വിഷയങ്ങളെ വ്യക്തമായി വിവരിക്കുന്ന ലേഖനം ഉടന്‍തന്നെ പ്രസിദ്ധീകരിക്കാന്‍ കര്‍ത്താവു മനോവയെ സഹായിക്കട്ടെ! 'നിത്യസ്തുതിയ്ക്കു യോഗ്യമായ പരിശുദ്ധ പരമ ദിവ്യകാരുണ്യത്തിന്, എന്നേരവും ആരാധനയും സ്തുതിയും പുകഴ്ചയും ഉണ്ടായിരിക്കട്ടെ!'

തുടരും...

ഉടന്‍ പ്രതീക്ഷിക്കുക: കത്തോലിക്കാസഭയെ വീഴ്ത്തിയവര്‍ ഇന്നു വാഴ്ത്തപ്പെട്ടവര്‍!

NB: വായനക്കാരില്‍നിന്നു മനോവ പ്രതീക്ഷിക്കുന്നത് നിങ്ങളുടെ വോട്ടും അഭിപ്രായവുമാണ്! അത് എന്തുതന്നെയായിരുന്നാലും രേഖപ്പെടുത്തണമെന്ന് അപേക്ഷിക്കുന്നു! വോട്ടു 'സബ്മിറ്റ്' ചെയ്യുവാനും അഭിപ്രായം 'സെന്‍ഡ്' ചെയ്യാനും പ്രത്യേകം കോളങ്ങള്‍ ചുവടെ ചേര്‍ത്തിരിക്കുന്നു! കൂടാതെ, ഈ ലേഖനം കൂടുതല്‍ ആളുകളെ അറിയിക്കണമെന്ന് ആഗ്രഹിക്കുന്നവര്‍ക്ക് പ്രചരണത്തിനുള്ള സൗകര്യവും ഒരുക്കിയിട്ടുണ്ട്! ഇത് വലിയൊരു സുവിശേഷവേലയാണ്!

ഫെയ്സ് ബുക്കിലൂടെ പ്രതികരിക്കാന്‍ സ്വാഗതം! -മനോവ ഓണ്‍ലൈന്‍-

    1019 views

LOG IN

Lost your password?

SIGN UP

LOST PASSWORD